ហ្ស៊េរុយសាឡិម ៖ នាយករដ្ឋមន្ត្រីអ៊ីស្រាអែល លោក បេចានមីន ណេតាន់យ៉ាហ៊ូ បាននិយាយថា កងកម្លាំងអ៊ីស្រាអែល ឥឡូវនេះ គ្រប់គ្រង ៦០ ភាគរយ នៃ តំបន់ ហ្គាហ្សា ដោយបង្ហាញថា កងទ័ពបានពង្រីកចូលទៅក្នុងទឹកដីប៉ាឡេស្ទីន ច្រើនជាងអ្វី ដែលបានកំណត់ នៅក្នុងបទឈប់បាញ់។

ការអត្ថាធិប្បាយ របស់លោក បានកើតឡើង ក្នុងពេលដែល Gaza នៅតែជាប់គាំង ដោយសារអំពើហឹង្សាប្រចាំថ្ងៃ ខណៈដែលកិច្ចខិតខំប្រឹងប្រែងដើម្បីជំរុញបទឈប់បាញ់ដ៏ផុយស្រួយ និង បញ្ចប់សង្រ្គាមជាអចិន្ត្រៃយ៍ ហាក់ដូចជាបានជាប់គាំង។

លោក Netanyahu បាននិយាយ កាលពីថ្ងៃព្រហស្បតិ៍ថា «ក្នុងរយៈពេលពីរឆ្នាំ កន្លងមកនេះ យើងបានបង្ហាញពិភពលោកទាំងមូល នូវអ្វីដែលកងកម្លាំងដ៏ខ្លាំងក្លា ត្រូវបានបង្កប់ នៅក្នុងប្រជាជនរបស់យើង នៅក្នុងរដ្ឋរបស់យើង នៅក្នុងកងទ័ពរបស់យើង នៅក្នុងបេតិកភណ្ឌរបស់យើង»។ លោកបានបន្ថែមថា «យើងបាននាំយកចំណាប់ខ្មាំងរបស់យើងទាំងអស់ ត្រឡប់ទៅផ្ទះវិញ »។ លោកបានបញ្ជាក់ថា «ថ្ងៃនេះយើងគ្រប់គ្រងបាន ៦០ ភាគរយ »។

ក្រោមលក្ខខណ្ឌនៃបទឈប់បាញ់ ដែលសម្របសម្រួលដោយសហរដ្ឋអាមេរិក រវាងអ៊ីស្រាអែល និងក្រុមហាម៉ាសដែលចូលជាធរមាន តាំងពីខែតុលាមក, កងកម្លាំងអ៊ីស្រាអែលត្រូវដកខ្លួន ទៅកាន់អ្វីដែលគេហៅថា “ខ្សែបន្ទាត់លឿង” នៅតំបន់ហ្គាហ្សា ដោយទុកឱ្យពួកគេគ្រប់គ្រងលើទឹកដីប៉ាឡេស្ទីន ជាង ៥០ ភាគរយ។

ប៉ាឡេស្ទីនជាង ៨៥០ នាក់ ត្រូវបានសម្លាប់ ចាប់តាំងពីបទឈប់បាញ់បានចាប់ផ្តើម នេះបើយោងតាមក្រសួងសុខាភិបាលរបស់ហ្គាហ្សា ដែលប្រតិបត្តិការនៅក្រោមអាជ្ញាធរហាម៉ាស ហើយតួលេខរបស់ពួកគេត្រូវបានចាត់ទុកថា អាចទុកចិត្តបាន ដោយអង្គការសហប្រជាជាតិ។ ក្នុងរយៈពេលដូចគ្នានេះ យោធាអ៊ីស្រាអែលបាននិយាយថា ទាហាន៥នាក់ត្រូវបានសម្លាប់ នៅតំបន់ហ្គាហ្សា៕

ប្រភពពី AFP ប្រែសម្រួល ៖ សារ៉ាត