ព្យុងយ៉ាង ៖ លោក គីម ជុងអ៊ុន មេដឹកនាំកូរ៉េខាងជើង បានអំពាវនាវ ឲ្យប្រទេសរបស់ខ្លួន ខិតខំប្រឹងប្រែងបង្កើនឃ្លាំងសព្វាវុធនុយក្លេអ៊ែរ ដោយបញ្ជាក់ពីគោលដៅប្រកបដោយមហិច្ឆតា អួតអាងថា នឹងបង្កើនបរិមាណ ឲ្យវ៉ាដាច់ប្រទេសទាំងអស់ នៅលើពិភពលោក។

ការលើកឡើងយ៉ាងដូច្នេះ របស់លោក គីម ជុងអ៊ុន បានធ្វើឡើង ក្នុងពេលដែលរូបលោកដឹកនាំកិច្ចប្រជុំពេញអង្គ របស់គណបក្សពលករកូរ៉េ WPK ដែលជាបក្សកំពុងកាន់អំណាច រៀបចំធ្វើឡើង រយៈពេល ៣ ថ្ងៃ ពោលគឺ ចាប់ពីថ្ងៃទី២០ ដល់ ២២ ខែមិថុនា។

ទីភ្នាក់ងារសារព័ត៌មានមជ្ឈិមកូរ៉េ KCNA រៀបរាប់ថា «ជាមួយនឹងបច្ចេកវិទ្យានុយក្លេអ៊ែរ ជាមូលដ្ឋាន, ផែនការកាន់តែទូលំទូលាយ, ការច្នៃប្រឌិត ព្រមទាំង ការលើកទឹកចិត្ត នឹងត្រូវបានអនុវត្ត ជាមួយនឹងល្បឿននៃការផលិតអាវុធនុយក្លេអ៊ែរ កាន់តែកើនឡើង។ លោក Kim បានដាក់ចេញនូវភារកិច្ច ដើម្បីអនុវត្តការងារនេះ ប្រកបដោយថាមពល ដើម្បីបង្កើនទ្រព្យសម្បត្តិការពារ ដ៏មានអានុភាពប្រភេទនេះ ដោយមិនបន្ធូរដៃ ជាមួយនឹងគោលដៅ វ៉ាដាច់គេទាំងអស់ នៅលើពិភពលោក»។

គិតត្រឹមឆ្នាំ ២០២៥, ប្រទេស រុស្ស៊ី ត្រូវបានគេប៉ាន់ប្រមាណថា មានក្បាលគ្រាប់នុយក្លេអ៊ែរ ប្រមាណ ៥,៤៦០ គ្រាប់, អាមេរិក មាន ៥,១៨០គ្រាប់ ខណៈដែល ប្រទេស ចិន មានចំនួន ៦០០គ្រាប់។ បណ្តារដ្ឋ ដែលមានច្រើន បន្ទាប់ពីប្រទេសទាំងបីនេះ រួមមាន បារាំង, អង់គ្លេស, ឥណ្ឌា, ប៉ាគីស្ថាន, អ៊ីស្រាអែល និង កូរ៉េខាងជើង នេះបើតាមគេហទំព័រ Statista ។

បើតាម Yonhap , អង្គប្រជុំ ក៏បានរំលឹកនូវគោលនយោបាយរបស់ខ្លួន ក្នុងការប្រកាសចំៗថា កូរ៉េខាងត្បូង គឺជាប្រទេសអរិភាពបំផុតរបស់ខ្លួន ហើយបានរិះគន់យ៉ាងខ្លាំង ចំពោះសម្ព័ន្ធភាពយោធា រវាងទីក្រុងសេអ៊ូល និង សហរដ្ឋអាមេរិក៕

ប្រភព ៖ Yonhap ប្រែសម្រួល ៖ សារ៉ាត