កៀវ ៖ ការវាយប្រហារមីស៊ីលរបស់ប្រទេសរុស្ស៊ី ទៅលើទីក្រុងកៀវ របស់អ៊ុយក្រែន បានសម្លាប់មនុស្ស ចំនួន៨នាក់ ពោលគឺនៅមុនពេលមានកិច្ចប្រជុំកំពូល របស់អង្គការណាតូ ក្នុងសប្តាហ៍នេះ។

អាជ្ញាធរនិយាយថា នៅថ្ងៃចន្ទនេះ អគារលំនៅដ្ឋានមួយកន្លែង ស្ថិតក្នុងរដ្ឋធានីកៀវ ប្រទេសអ៊ុយក្រែន ត្រូវបានបំផ្លាញទៅជាគំនរបាក់បែក បន្ទាប់ពីរងការវាយប្រហារ ពីសំណាក់រុស្ស៊ី។

ប្រភពបញ្ជាក់ថា ការវាយប្រហារ ដោយមីស៊ីលបាលីស្ទិក បានសម្លាប់មនុស្ស យ៉ាងហោចណាស់ ៨ នាក់ និង រាប់សិបនាក់ទៀត រងរបួស ខណៈដែលក្រុមអ្នកជួយសង្គ្រោះកំពុងស្វែងរកអ្នកនៅរស់រានមានជីវិត នៅក្នុងគំនរបាក់បែក នៃ អគារលំនៅដ្ឋាន កម្ពស់៩ជាន់។

ការវាយប្រហារនេះធ្វើឡើង ចំពេលដែល សេតវិមាន បាននិយាយថា លោក Trump ប្រធានាធិបតីអាមេរិក គ្រោងនឹងជួបជាមួយ លោក Zelensky ប្រធានាធិបតីប្រទេសអ៊ុយក្រែន នៅថ្ងៃពុធនេះ អំឡុងពេលកិច្ចប្រជុំកំពូល របស់ អង្គការយោធាអន្តរជាតិ ណាតូ (NATO)៕

ប្រភព ៖ AFP ប្រែសម្រួល ៖ សារ៉ាត