កៀវ ៖ ផែនទីបង្ហាញគន្លងហោះហើរ ដែលប៉ាន់ស្មានទុករបស់ដ្រូន និងមីស៊ីលរុស្ស៊ី ឥឡូវនេះ មានដាក់ឱ្យប្រើប្រាស់សម្រាប់ប្រជាជនអ៊ុយក្រែនទាំងអស់ នៅក្នុងកម្មវិធីទូរសព្ទ App ដែលមានឈ្មោះថា “Air Raid Alert” ឬ កម្មវិធីជូនដំណឹងអំពីការវាយប្រហារតាមអាកាស។ នេះបើតាមការអះអាងរបស់នាយករដ្ឋមន្ត្រីអ៊ុយក្រែន លោក Sergii Koretskyi កាលពីថ្ងៃសៅរ៍។

យោងតាមនាយករដ្ឋមន្ត្រីរូបនេះ, មុខងារថ្មីនេះគឺជាលទ្ធផលនៃកិច្ចខិតខំប្រឹងប្រែងរួមគ្នារវាងក្រសួងផ្លាស់ប្តូរឌីជីថល, ក្រសួងការពារជាតិ, កងទ័ពអាកាសអ៊ុយក្រែន និង ក្រុមហ៊ុនបច្ចេកវិទ្យាព័ត៌មានរបស់អ៊ុយក្រែន។

លោក Koretskyi បានរំលឹកប្រជាជនអ៊ុយក្រែនថា រាល់នាទីសុទ្ធតែមានសារៈសំខាន់ ក្នុងការជួយសង្គ្រោះជីវិតជនស៊ីវិល នៅពេលមានការវាយប្រហារពីសំណាក់សត្រូវ។

នាយករដ្ឋមន្ត្រីបានអំពាវនាវឱ្យប្រជាជនអ៊ុយក្រែន កុំមើលរំលងការជូនដំណឹងអំពីការវាយប្រហារតាមអាកាសឱ្យសោះ ដោយត្រូវប្រញាប់ទៅកាន់ទីជម្រកសុវត្ថិភាពភ្លាមៗ ហើយស្នាក់នៅទីនោះ រហូតទាល់តែមានសេចក្តីជូនដំណឹងថា ស្ថានភាពបានត្រឡប់ទៅជាធម្មតាវិញ។

បើតាម RBC-Ukraine, ក្រសួងផ្លាស់ប្តូរឌីជីថលអ៊ុយក្រែនបានបញ្ជាក់ថា ផែនទីនេះនឹងបង្ហាញអំពីមីស៊ីលប្រភេទនាំផ្លូវ, ដ្រូនវាយប្រហារ, ដ្រូនដែលប្រើម៉ាស៊ីនប្រតិកម្ម ព្រមទាំង គ្រាប់បែក ជាដើម។

យ៉ាងណាមិញ សម្រាប់ពេលនេះ ផែនទីនេះមិនទាន់អាចតាមដានមីស៊ីលផ្លោង បាននៅឡើយទេ៕

ប្រភព ៖ RBC-Ukraine, ប្រែសម្រួល ៖ សារ៉ាត