សម្រស់ទឹកធ្លាក់ជីអាំង លាក់ខ្លួនកណ្តាលព្រៃជ្រៅនៃខេត្តមណ្ឌលគិរី
ស្ថិតនៅភាគឦសាននៃប្រទេស រមណីយដ្ឋានទឹកធ្លាក់ជីអាំង ឬសហគមន៍ទេសចរណ៍ធម្មជាតិទឹកធ្លាក់ជីអាំង កំពុងក្លាយជាគោលដៅទេសចរណ៍ដ៏ពេញនិយមមួយ ដែលសម្ងំលាក់ខ្លួនយ៉ាងស្ងៀមស្ងាត់ក្នុងព្រៃជ្រៅនៃខេត្តមណ្ឌលគិរី។ ទីនេះមិនត្រឹមតែផ្តល់នូវសម្រស់ធម្មជាតិដ៏ត្រជាក់ស្រស់ស្រាយប៉ុណ្ណោះទេ តែថែមទាំងបានបង្ហាញតថភាពនៃជីវភាព និងវប្បធម៌ប្រពៃណីដ៏ផូរផង់របស់បងប្អូនជនជាតិដើមភាគតិចផងដែរ។
ស្ថិតនៅភូមិពូញ៉ាវ ឃុំមេម៉ង់ ស្រុកកែវសីមា ទឹកធ្លាក់ជីអាំង គឺជាកំណប់ទ្រព្យធម្មជាតិមួយ ដែលហ៊ុមព័ទ្ធដោយព្រៃឈើខៀវស្រងាត់។ ទឹកដែលហូរធ្លាក់ពីតំបន់ព្រៃភ្នំ បានហូរធ្លាក់មកកាន់អាងស្តុកទឹកទំហំជិត ៥០ម៉ែត្រការ៉េ មានទឹកថ្លាឈ្វេងពេញមួយឆ្នាំ ដែលស័ក្តិសមបំផុតសម្រាប់ការមុជទឹកកម្សាន្ត។ ដើម្បីទៅដល់រមណីយធម្មជាតិមួយនេះ ភ្ញៀវទេសចរត្រូវបន្តដំណើរពីផ្លូវធំចម្ងាយ ៤គីឡូម៉ែត្រ ដោយចំណាយពេលប្រមាណ ៣០នាទី តាមរយៈសេវាម៉ូតូសហគមន៍ ឆ្លងកាត់ផ្លូវព្រៃ អូរ និងផ្លូវបត់បែនឡើងចុះ ដែលជាបទពិសោធន៍ទេសចរណ៍បែបផ្សងព្រេងដ៏រំភើប។
បង្កើតឡើងក្នុងឆ្នាំ២០២៣ សហគមន៍ទេសចរណ៍នេះមានសមាជិកចំនួន ៣១នាក់ ដែលសុទ្ធសឹងជាអ្នកបម្រើសេវាកម្មទេសចរណ៍ និងប្រកបរបរកសិកម្ម។ រាល់ដំណាំ សត្វចិញ្ចឹម និងម្ហូបអាហារធម្មជាតិដែលរកបាន ត្រូវបានរៀបចំលក់ជូនភ្ញៀវទេសចរ ដែលនេះជាការជួយផ្ដល់ចំណូលដោយផ្ទាល់ដល់សេដ្ឋកិច្ចគ្រួសារ។
ក្រៅពីអត្ថប្រយោជន៍សេដ្ឋកិច្ច ការមកកម្សាន្តទីនេះក៏ជាការចូលរួមការពារធនធានធម្មជាតិ ដែលជាជម្រកសត្វព្រៃកម្រជាច្រើនប្រភេទ ដូចជា ឈ្លូស ប្រើស ជ្រូកព្រៃ ស្វា និងមាន់ព្រៃជាដើម។
គួរជម្រាបថា ក្រោមការដឹកនាំរបស់សហគមន៍ជនជាតិដើមភាគតិចពូនង និងការគាំទ្រពីគម្រោងរេដបូកកែវសីមា ភ្ញៀវទេសចរដែលមកកាន់ទឹកធ្លាក់ជីអាំង មិនត្រឹមតែបានងូតទឹកកម្សាន្តប៉ុណ្ណោះទេ តែថែមទាំងអាចដើរទស្សនាព្រៃព្រឹក្សា ស្វែងយល់ពីសត្វព្រៃ ភ្លក់រសជាតិម្ហូបប្រចាំតំបន់ ស្នាក់នៅផ្ទះសហគមន៍ និងដកស្រង់បទពិសោធន៍ពីវប្បធម៌ដ៏អស្ចារ្យរបស់ជនជាតិដើមភាគតិចពូនងថែមទៀតផង ៕
ដោយ៖ម៉ា ដេប៉ូ
