អតីតប្រធានសហជីពសេរីកម្មករនៃព្រះរាជាណាចក្រកម្ពុជា លោក ជា មុនី ត្រូវបានតុលាការលើកលែងការចោទប្រកាន់ហើយយោងតាមលិខិតមួយដែលក្រុមសារព័ត៌មានទើបបានទទួលនៅថ្ងៃនេះ។ លោក ជា មុនី ត្រូវ បានមេដឹកនាំសហជីពចំនួន១២០ បានដាក់ពាក្យប្តឹងទៅតុលាការកាលពីចុងឆ្នាំ២០១៧ ដោយចោទថា លោកបានជាប់ពាក់ព័ន្ធនូវការអំពាវនាវឲ្យសហគមន៍អឺរ៉ុបដាក់ទណ្ឌកម្មមកលើរាជរដ្ឋាភិបាលកម្ពុជា។ លោក ជា មុនី   អាយុ៤៨ឆ្នាំ ពេលនោះ បានរងការចោទពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ ប្រព្រឹត្តនៅរាជធានីភ្នំពេញ កាលពីថ្ងៃទី១៥ ខែធ្នូ ឆ្នាំ២០១៧។ ប៉ុន្តែយោងតាមលិខិតជូនដំណឹងស្តីពីការលើកលែងចោទប្រកាន់ចុះថ្ងៃទី២៨ ធ្នូ ឆ្នាំ២០១៨ ជនត្រូវចោទឈ្មោះជា មុនី ត្រូវបានសម្រេចលើកលែងការចោទប្រកាន់ហើយ តាមដីកាលេខ៦០៤៩។ សេចក្តីរាយការណ៍បានកត់សម្គាល់ថាលោក ជា មុនី ក្រោយមានពាក់បណ្តឹងនោះ បានគេចខ្លួនទៅនៅក្រៅប្រ ទេសដែលរហូតមកទល់នឹងពេលនេះ មិនទាន់វិលត្រឡប់ចូលមកក្នុងប្រទេសវិញឡើយ។ សេចក្តីរាយការណ៍ពីប្រភពដែលស្និទ្ធនឹងលោក ជា មុនី បាននិយាយថា លោក ជា មុនី កំពុងតែស្ថិតនៅក្នុងប្រទេសថៃជាមួយ អតីតក្រុមមន្ត្រីអតីតគណបក្សសង្គ្រោះជាតិ៕