ភ្នំពេញ៖ សមាគមទូរទស្សន៍កម្ពុជា បានជួបប្រជុំជាមួយថ្នាក់ដឹកនាំស្ថានីយវិទ្យុ និងទូរទស្សន៍ដើម្បីពិនិត្យពិភាក្សាលើសំណើរ ស្តីពីអំពីផលវិបាក ក្នុងពេលកូវីដ-១៩ ពិសេសការបាត់ Sponser ដើម្បីទ្រទ្រង់សកម្មភាពការងារ ក្នុងវិស័យសោតទស្សន៍ ក្រោមអធិបតីភាព ឯកឧត្តម អ៊ុក ប្រាថ្នា រដ្ឋលេខាធិការប្រចាំការក្រសួងព័ត៌មាន និង ឯកឧត្តម ម៉ៅ អាយុទ្ធ ប្រធានសមាគមទូរទស្សន៍កម្ពុជា នៅព្រឹកថ្ងៃអង្គារ៍ ទី២៣ ខែមិថុនា ឆ្នាំ២០២០ នៅទីស្តីការក្រសួងព័ត៌មាន ។

ឯកឧត្តម ផុស សុវណ្ណ ប្រតិភូរាជរដ្ឋាភិបាល ទទួលបន្ទុកអគ្គនាយក នៃអគ្គនាយកដ្ឋាន ព័ត៌មាន និងសោតទស្សន៍ បានផ្តល់វេទិកាជូនថ្នាក់ដឹកនាំស្ថានីយវិទ្យុ និង ទូរទស្សទាំងអស់ដើម្បីបញ្ជាក់ពីអ្វីដែលជាសំណូមពរ របស់ម្ចាស់ស្ថានីយ ដើម្បីឯកឧត្តម នាំយកបញ្ហានេះ លើកជាយោបល់ជូន ឯកឧត្តមរដ្ឋមន្ត្រីក្រសួងព័ត៌មាន ពិនិត្យ និង ដោះស្រាយ ។

ជាការកត់សំគាល់ នៅក្នុងកិច្ចប្រជុំនេះ ថ្នាក់ដឹកនាំគ្រប់ស្ថានីយ៍វិទ្យុ និងទូរទស្សន៍ បានលើកឡើងពីកង្វល់ធំៗជាច្រើន និង បញ្ហាជារួមមួយចំនួន ទាក់ទងនឹងដំណើរការរបស់សោតទស្សន៍  ដែលត្រូវបានលើកឡើងជាសំណូមពរជូនដល់ ឯកឧត្តម រដ្ឋមន្រ្តីក្រសួងព័ត៌មាន មេត្តាជួយពិនិត្យ និង ដោះស្រាយ ដើម្បីជួយសម្រួល បន្ធូរបន្ថយផ្នែកមួយចំនួនដល់បណ្តាស្ថានីវិទ្យុ និងទូរទស្សន៍ ខណៈពេលកើតមានវិបត្តិកូវីដ-១៩ ទូទាំងសកលលោក ជាហេតុនាំឲ្យប៉ះពាល់ដល់ប្រាក់ចំណូល។

ជាលទ្ធផល សំណូមពររបស់បណ្តាថ្នាក់ដឹកនាំ មកពីស្ថានីយវិទ្យុ និងទូរទស្សន៍ជាច្រើន ត្រូវបាន ឯកឧត្តម អ៊ុក ប្រាថ្នា ទទួលយក និង ពិនិត្យ ពិចារណា ដើម្បីធ្វើសេចក្តីរាយការណ៍ ជូនឯកឧត្តមរដ្ឋមន្ត្រីក្រសួងព័ត៌មាន ពិនិត្យ និងសម្រេច ៕