ភ្នំពេញ៖ ថៅកែភោជនីយដ្ឋាន «ធារ៉ា» មានឈ្មោះថា កាន់ វុទ្ធី ដែលជាជនដៃដល ត្រូវបាននគរបាលប៉ុស្តិ៍វត្តភ្នំ សម្រេចឃាត់ខ្លួន និង ត្រូវបានបញ្ជូនទៅអធិការដ្ឋាននគរបាលខណ្ឌដូនពេញ នៅល្ងាចថ្ងៃទី១០ ខែមិថុនា ឆ្នាំ២០២០ នេះ ករណីប្រព្រឹត្តអំពើយ៉ាងព្រៃផ្សៃលើមេការហាងផឹកស៊ីរបស់ខ្លួន គ្រាន់តែចូលជួយឃាត់ជម្លោះជាមួយប្រពន្ធដែរកំពុង់ឈ្លោះគ្នា។

បើកតាមសម្ដី លោក សុត សុភ័ក្រ ជាមេការភោជនីយដ្ឋាន «ធារ៉ា» ដែលត្រូវបានថៅកែប្រើអំពើហិង្សាយ៉ាងព្រៃផ្សៃ និងត្រូវបានបណ្តេញចេញពីការងារនោះបាន ថែមទៀតថាគាត់ បានសម្រេចចិត្តមកដាក់ពាក្យបណ្តឹង ចូលព្រះរាជអាជ្ញាអមសាលាដំបូងរាជធានីភ្នំពេញ រួចរាល់ហើយ ពីបទ «ហិង្សាដោយចេតនាមានស្ថានទម្ងន់ទោស» ប្រព្រឹត្តកាលពីថ្ងៃទី៦ ខែមិថុនា ឆ្នាំ២០២០ វេលាម៉ោង១១៖ ៣៥នាទី យប់  នៅចំណុចភោជនីយដ្ឋាន «ធារ៉ា» សង្កាត់វត្តភ្នំ ខណ្ឌដូនពេញ រាជធានីភ្នំពេញ។

បើតាម លោក អ៊ឹម ផល្គុន អធិការរងស្ដីទីព្រហ្មទណ្ឌខណ្ឌដូនពេញ បានឲ្យដឹងថា ថៅកែភោជនីយដ្ឋាន «ធារ៉ា» មានឈ្មោះថា កាន់ វុទ្ធី ដែលជាជនដៃដល ត្រូវបាននគរបាលប៉ុស្តិ៍វត្តភ្នំ សម្រេចឃាត់ខ្លួន និងត្រូវបានបញ្ជូនទៅអធិការដ្ឋាននគរបាលខណ្ឌដូនពេញ ហើយ។ បច្ចប្បន្នជនសង្ស័យឃាត់ខ្លួនជាបណ្ដោះអាសន្ននៅនគរបាលខណ្ឌដូនពេញ រងចាំកសាងសំណុំរឿងបញ្ជូលទៅតុលាការដើម្បីចាត់ការតាមនីតិវិធីច្បាប់៕