ភ្នំពេញ ៖ លោក ឌី រ័ត្នខេមរុណ អភិបាលរង ខណ្ឌមានជ័យ អញ្ជើញ ចុះពិនិត្យមើលសកម្មភាពចាក់បេតុងផ្លូវ ១ខ្សែ ប្រវែង ៤៥០ម៉ែត្រ ត្រង់ចំណុច ស្តុបវិទ្យាល័យ ហ៊ុន សែន ចាក់អង្រែ ដល់បុរីវីឡាថោន ស្ថិតនៅសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ដោយក្រុមហ៊ុន BBE នៅព្រឹកថ្ងៃចន្ទ ៧កើត ខែបុស្ស ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី២១ ខែធ្នូ ឆ្នាំ២០២០ ។

លោក ឌី រ័ត្នខេមរុណ គួរបញ្ជាក់ថា កាលពីថ្ងៃទី១៦ ខែធ្នូ ឆ្នាំ២០២០កន្លងទៅ លោកអភិបាលរង បានចុះពិនិត្យការឈូសឆាយផ្លូវម្តងរួចមកហើយ គម្រោងជួសជុលផ្លូវ ១ខ្សែ ប្រវែង ៤៥០ម៉ែត្រ ជាចំណងដៃ របស់ សាលារាជធានីភ្នំពេញ ជូនដល់បងប្អូនប្រជាពលរដ្ឋក្នុងមូលដ្ឋានខណ្ឌមានជ័យ ជាពិសេសបងប្អូនប្រជាពលរដ្ឋដែលរស់នៅសង្កាត់ចាក់អង្រែក្រោម តែម្ដង ជាក់ស្ដែងថ្ងៃនេះ ក្រុមហ៊ុន BBE បានធ្វើការចាក់បេតុង ផងដែរ ។

ទន្ទឹមនឹងនេះដែរ លោក ឌី រ័ត្នខេមរុណ បន្តទៀតថា បងប្អូនប្រជាពលរដ្ឋ បានសំដែងនូវអារម្មណ៍រំភើប សប្បាយរីករាយ ដែលបានទទួល ចំណងដៃ ផ្លូវ ១ខ្សែ ប្រវែង ៤៥០ម៉ែត្រ ពីសាលារាជធានីភ្នំពេញ ដែលធានានូវបរិមាណ គុណភាព និងសោភ័ណភាព ក្នុងមូលដ្ឋានខណ្ឌមានជ័យ របស់យើង ដើម្បីបម្រើឱ្យបងប្អូនប្រជាពលរដ្ឋងាយស្រួលធ្វើដំណើរ ៕ ដោយ / គ្រី សម្បត្តិ