ឆ្លងកាត់៥៣ប្រកួត ក្រុមកីឡាបាល់បោះ Yuetai Mekongers បានក្លាយជាជើងឯក ការប្រកួតកីឡាបាល់បោះ លីក ឆ្នាំ២០២០ ក្រោយយកឈ្នះ ក្រុមកីឡាបាល់បោះ Extra Joss Fighters នៅវគ្គផ្តាច់ព្រ័ត្រ ដែលរៀបចំឡើងដោយសហព័ន្ធកីឡាបាល់បោះកម្ពុជា ក្រោមការជួយឧបត្ថម្ភពីក្រុមហ៊ុនឯកជន ដើម្បីអភិឌ្ឍន៍កីឡាបាល់បោះកម្ពុជា ត្រៀមការប្រកួត SEA GAMES 2021 និង SEA GAMES 2023 ពិធីបិទធ្វើក្រោមអធិបតីភាព ឯ ឧ ឈី សម្បត្តិ អនុប្រធានសហព័ន្ធកីឡាបាល់បោះកម្ពុជា តំណាង ឯ ឧ ស៊ាន បូរ៉ាត ប្រធានសហព័ន្ធកីឡាបាល់បោះកម្ពុជា នៅមជ្ឈមណ្ឌលជាតិហ្វឹកហ្វឺនកីឡា ។

ចំពោះលទ្ធផលនៃការប្រកួត ក្រុមកីឡាបាល់បោះ ABA Dragon ទទួលបាន លេខ៣ ក្រោយយកឈ្នះ ក្រុមកីឡាបាល់បោះ Master Tapsi ជាមួយលទ្ធផល ៨៨ទល់៦៤ ខណៈក្រុមបាល់បោះ Yuetai Mekongers បានយកឈ្នះ ក្រុមកីឡាបាល់បោះ Extra Joss Fighters ក្នុងលទ្ធផល ៨៧ទល់៨៤ នៅវគ្គផ្តាច់ព្រ័ត្រដូចគ្នា ។
ឯ ឧ ឈី សម្បត្តិ ក្នុងនាមថ្នាក់ដឹកសហព័ន្ធ បានវាយតម្លៃខ្ពស់ចំពោះកីឡាករ និងមន្រ្តីអាជ្ញាកណ្តាល ដែលប្រកាន់ភ្ជាប់នូវវិន័យក្រមសីលធម៌ ក្នុងការប្រកួតកីឡាបាល់បោះលីក ឆ្នាំ២០២០ ដោយជោគជ័យ ។ លីគបាល់បោះនេះ ធ្វើឡើងក្នុងគោលបំណង ដើម្បីដុះខាត់សមត្ថកីឡាករបាល់បោះ មន្រ្តីបច្ចេកទេស សម្រាប់ត្រៀមរៀបចំការប្រកួតកីឡា SEA GAMES 2023 ដែលកម្ពុជាធ្វើម្ចាស់ផ្ទះការប្រកួត ។

សូមបញ្ជាក់ថា ការប្រកួតកីឡាបាល់បោះលីក ឆ្នាំ២០២០ មាន៧ក្រុមចូលរួម ដោយមាន៥៣ប្រកួត ដែលបានចាប់ផ្តើមការប្រកួតជាផ្លូវការតាំងពីពាក់កណ្តាល ឆ្នាំ២០២០ ប៉ុន្តែដោយសារតែវិបត្តិ COVID-19 ត្រូវបានពន្យាពេលរហូតដល់ថ្ងៃទី២៤ ខែមករា ឆ្នាំ២០២១ ទើបបញ្ចប់ការប្រកួតជាផ្លូវការ ៕