ក្រុមហ៊ុន Moderna នឹងប្រគល់វ៉ាក់សាំង Covid-19 ចំនួន១០០លានដូសអោយសហរដ្ឋអាមេរិកនៅត្រឹមចុងត្រីមាសទី១ ឆ្នាំ២០២១
អាមេរិក៖ ក្រុមហ៊ុនជីវបច្ចេកវិទ្យាវិទ្យាសាស្រ្តអាមេរិក ម៉ូឌែណា កំពុងដំណើរការរៀបចំដើម្បីប្រគល់វ៉ាក់សាំងបង្ការជំងឺ COVID-19 របស់ខ្លួនប្រមាណ១០០លានដូសឲ្យទៅសហរដ្ឋអាមេរិកនៅត្រឹមចុងត្រីមាសទី១ឆ្នាំ២០២១នេះ ជាមួយនឹងវ៉ាក់សាំង២០០លានដូសជាចំនួនសរុប ដែលនឹងត្រូវប្រគល់ជូនសហរដ្ឋអាមេរិកនៅដំណាច់៣ខែបន្ទាប់ ។
ក្រុមហ៊ុន ម៉ូឌែណា បានបញ្ជាក់ថា ខ្លួនបានផ្គត់ផ្គង់វ៉ាក់សាំងប្រមាណ៣០,៤លានដូសហើយគិតរហូតមកដល់ពេលនេះ នេះបើតាមការបញ្ជាក់ពីមជ្ឈមណ្ឌលបង្ការ និងគ្រប់គ្រងជំងឺសហរដ្ឋអាមេរិក ។ ក្រុមហុន ម៉ូឌែណា ក៏បានឲ្យដឹងកាលពីដើមខែនេះដែរថា ខ្លួននឹងផលិតវ៉ាក់សាំង COVID-19 ប្រមាណ៦០០លានដូសក្នុងឆ្នាំ២០២១នេះ កើនឡើង១០០លានដូសពីការព្យាករណ៍កាលពីពេលមុន ។
ក្រុមហ៊ុន ម៉ូឌែណា ក៏បន្ថែមទៀតថា ខ្លួននឹងបន្តការវិនិយោគ និងបន្ថែមបុគ្គលិក ដើម្បីបង្កើនសមត្ថភាព ផលិតវ៉ាក់សាំងអោយបាន១ពាន់លានដូសនៅឆ្នាំ២០២១នេះ ៕ ប្រភព៖ Reuters
