នគរបាលខណ្ឌឫស្សីកែវឃាត់ខ្លួនជនសង្ស័យ២នាក់ជាបន្តបន្ទាប់ ក្រោយពីឆក់យកទូរស័ព្ទដៃពីនារីម្នាក់បានសម្រេច
ភ្នំពេញ ៖ កម្លាំងល្បាតនគរបាលប៉ុស្តិ៍ឫស្សីកែវ បានឃាត់ខ្លួនជនសង្ស័យ២នាក់ជាបន្តបន្ទាប់ ពាក់ព័ន្ធ ករណីឆក់យកទូរស័ព្ទដៃពីនារីម្នាក់បានសម្រេច កាលពីវេលាម៉ោង ១១ និង៣០នាទីថ្ងៃត្រង់ ថ្ងៃទី២១ ខែកុម្ភៈ ឆ្នាំ២០២១ ត្រង់ចំណុចផ្លូវបេតុង ក្រុមទី៥ ភូមិសាមគ្គី សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។
ជនសង្ស័យទី១-ឈ្មោះ សុះ អារីហ្វីន ហៅ ខ្មៅ ភេទប្រុស អាយុ៣៣ឆ្នាំ មុខរបរ មិនពិតប្រាកដ មានទីលំនៅផ្ទះជួល ផ្លូវ រថភ្លើង ភូមិបាក់ទូក សង្កាត់ទួលសង្កែ១ ខណ្ឌឫស្សីកែវ រាជធានីភ្នំពេញ (មានសារធាតុញៀន)។ និងទី២-ឈ្មោះជឹម សង្វា ហៅ ម៉ូម អាយុ២៦ឆ្នាំ មុខរបរគ្មាន មានទីលំនៅមិនពិតប្រាកដ(មានសារធាតុញៀន) បានរត់គេចខ្លួនចូលទៅសម្ងំក្នុងលូអស់មួយយប់ បន្ទាប់ពីធ្វើសកម្មភាព (ឆក់ទូរស័ព្ទដៃរបស់ជនរងគ្រោះរួច)។
ចំណែកជនរងគ្រោះ ឈ្មោះ ហួន សុខលឿន ភេទស្រី អាយុ៤១ឆ្នាំ មុខរបរ លក់ដូរ មានទីលំនៅផ្ទះលេខ១៣៩០ ផ្លូវជាតិលេខ៥ ក្រុមទី៣ ភូមិឃ្លាំងសាំង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។ រីឯសម្ភារដកហូតរួមមាន៖១-ម៉ូតូ១គ្រឿ ម៉ាកហុងដាឌ្រីមC១២៥ ពណ៌ខ្មៅ ស៊េរីឆ្នាំ២០១៩ ពាក់ស្លាកលេខ កំពត១O-៨២៤៥។
២-ទូរស័ព្ទដៃ១គ្រឿង ម៉ាកOPPO S៩ ពណ៌ស្វាយ។
ក្នុងរបាយការណ៍របស់សមត្ថកិច្ចបានបញ្ចាក់ថា នៅមុនពេលកើតហេតុជនរងគ្រោះជិះម៉ូតូម៉ាកSCOOPY ពណ៌ ស ពាក់ស្លាកលេខភ្នំពេញ១BQ-១៥២៣ជិះគ្នា៣នាក់ត្រឡប់មកពីផ្សារសាំហាន់ទៅផ្ទះជិតដល់ច្រកចូលភូមិសាមគ្គី បុរីមហាសេដ្ឋី ស្រាប់តែឃើញជនសង្ស័យ២នាក់ជិះម៉ូតូម៉ាក់ហុងដាC១២៥ពណ៌ខ្មៅ ស៊េរីឆ្នាំ២០១៩ ពាក់ស្លាកលេខ១O-៨២៤៥ មកធ្វើសកម្មភាពឆក់យកទូរស័ព្ទរបស់ ជនរងគ្រោះតែម្តង ស្របពេលកម្លាំងសមត្ថកិច្ចល្បាតមកដល់ក៏ជួយធ្វើអន្តរាគមន៍ឃាត់បានជនសង្ស័យម្នាក់នាំមកកាន់ប៉ុស្តិ៍ ចំណែកបក្សពួករបស់គេម្នាក់ទៀតឈ្មោះ ម៉ូម បានរត់គេចខ្លួនចូលលូបាត់មួយយប់ លុះថ្ងៃទី២២ខែកុម្ភៈឆ្នាំ២០២១វេលាម៉ោង១១ៈ០០នាទីនៅចំណុចកើតហេតុខាងលើសមត្ថកិច្ចយើងបានឃាត់ជនសង្ស័យបានម្នាក់ទៀតពេលជនសង្ស័យចេញពីលូហើយដែលមានឈ្មោះដូចខាងលើ។
បច្ចុប្បន្ននេះ កម្លាំងជំនាញខណ្ឌ កំពុងធ្វើការសាកសួរយកចម្លើយដើម្បីកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញអនុវត្តតាមនីតិវិធី ។ រីឯទូរស័ព្ទដៃសមត្ថកិច្ចបានប្រគល់ជូនជនរងគ្រោះវិញហើយ ៕ ដោយ ៖ ភារ៉ា និងប៊ុនធី
