លោក ចូ បៃដិន និងលោកស្រី កាម៉ាឡា ហារីស ថ្កោលទោសអំពើហិង្សាប្រឆាំងនឹងជនជាតិដើមអាស៊ី អំឡុងដំណើរទស្សនកិច្ចទៅកាន់ទីក្រុងអាត្លង់តា
អាមេរិក៖ ប្រធានាធិបតីអាមេរិកលោក ចូ បៃដិន និងអនុប្រធានាធិបតីអាមេរិកលោកស្រី កាម៉ាឡា ហារីស បានសម្តែងការគាំទ្រចំពោះពលរដ្ឋអាមេរិកដើមកំណើតអាស៊ី និង បានបរិហារពីការស្អប់ខ្ពើម នៃការរើសអើងជាតិសាសន៍ នៅពេលមេដឹកនាំទាំងពីរធ្វើដំណើរទស្សនកិច្ចទៅទីក្រុងអាត្លង់តា រដ្ឋចរចៀ នៅថ្ងៃសុក្រនេះ ។
ដំណើរទស្សនកិច្ចរបស់លោក បៃដិន និងលោកស្រី ហារីស ខាងលើនេះដែរ បានកើតមានឡើង មួយថ្ងៃបន្ទាប់ពីខ្មាន់កាំភ្លើងស្បែកសម្នាក់បានបាញ់សម្លាប់មនុស្ស៨នាក់ ក្នុងនោះមានស្រ្តី០៦នាក់ជាពលរដ្ឋអាមេរិកដើមកំណើតអាស៊ី ។ បច្ចុប្បន្នប៉ូលិសបានឃាត់ខ្លួនខ្មាន់កាំភ្លើងឈ្មោះ រ៉ូប៊ឺត អារ៉ុន ឡុង មានអាយុ២១ឆ្នាំ និងកំពុងស៊ើបអង្កេតពីមូលហេតុ នៅពីក្រោយការបាញ់ប្រហារយ៉ាងរង្គាលនេះ ។ ថ្លែងនៅឯសាកលវិទ្យា Emory ក្រោយជួបពិភាក្សាជាមួយមេដឹកនាំសហគមន៍ពលរដ្ឋអាមេរិកដើមកំណើតអាស៊ី លោក បៃដិន បានជំរុញឱ្យប្រជាជនអាមេរិកទាំងអស់ ក្រោកឈរឡើងធ្វើសកម្មភាពប្រឆាំងនឹងអំពើហិង្សា និងការរើសអើងពូជសាសន៍លើពលរដ្ឋអាមេរិកដើមកំណើតអាស៊ី ដើម្បីធានាឱ្យបានថា សហរដ្ឋអាមេរិកមិនមែនជាឋានសួគ៌សម្រាប់អំពើហិង្សា និងការរើសអើងពូជសាសន៍ជាដាច់ខាត ។
ដោយឡែកលោកស្រី ហារីស ក៏បាននិយាយដែរថា ការរើសអើងពូជសាសន៍ នៅតែបន្តកើតមានក្នុងសហរដ្ឋអាមេរិក… ក៏ប៉ុន្តែលោកប្រធានាធិបតីនិងខ្ញុំ នឹងមិននៅស្ងៀមឡើយ… យើងនឹងប្រឆាំងអំពើហិង្សា ការរើសអើងពូជសាសន៍ មិនថាវាកើតឡើងដោយរបៀបណា ឬនៅទីណានោះទេ ៕ ប្រភព៖ ស៊ីនហួរ
