អ្នកពាក់ព័ន្ធនឹងកម្មការិនី រោងចក្រកាត់ដេរម្នាក់ នៅ7NG នៅស្រុកខ្សាច់កណ្ដាល និងស្រុកពារាំងជិត ២០០ នាក់ តម្រូវយកសំណាក និងធ្វើចត្តាឡីស័ក
ខេត្តកណ្ដាល៖ អ្នកពាក់ព័ន្ធដោយផ្ទាល់ និងប្រយោល ប្រមាណជិត ២០០ នាក់ជាមួយនឹងកម្មការិនីម្នាក់ ដែលធ្វើការរោងចក្រកាត់ដេរ នៅតំបន់សេដ្ឋកិច្ចពិសេស 7NG ស្រុកខ្សាច់កណ្ដាល ខេត្តកណ្ដាល មានវិជ្ជមានជំងឺ កូវីដ១៩នោះត្រូវបានអាជ្ញាធរ និង មន្រ្តីក្រសួងសុខាភិបាលឱ្យយកសំណាក និងដាក់ឱ្យធ្វើ ចត្តាឡីស័ក ទាំងអស់គ្នា។
លោក ប៊ុន ផេង អភិបាលស្រុកខ្សាច់កណ្ដាល បាន ឲ្យដឹងនៅថ្ងៃនេះ ថា កម្មការិនីរូបនេះ មានឈ្មោះ ឌឿន ចន្ធា អាយុ ២២ ឆ្នាំ ធ្វើការនៅរោងចក្រកាត់ដេរសម្លៀកបំពាក់ Starlight apparel manufacturing co.,ltd ។ កាលពីថ្ងៃទី១៣ ខែមេសា បានទៅលេងស្រុកកំណើត នៅឯភូមិត្នោត ឃុំរកា ស្រុកពារាំង ខេត្តព្រៃវែង ហើយត្រឡប់មកវិញ នៅថ្ងៃទី១៩ ខែមេសា ឆ្នាំ២០២១។
លោកថាពេលកម្មការិនី ឌឿន ចន្ធា ចូលមកធ្វើការវិញ បុគ្គលិកសន្តិសុខ ក្នុងរោងចក្រខាងលើនេះ ក៏បានវាស់កម្ដៅ កម្មការិនីរូបនេះ ហើយក៏ឃើញកម្ដៅឡើងដល់ ៣៨ អង្សាសេ។ ដោយមើលទៅឃើញអាការៈដូចមិនសូវស្រួលខ្លួន សន្តិសុខនិង ខាងរដ្ឋបាល ក្នុងរោងចក្រ ក៏បានទាក់ទងមក អាជ្ញាធរ ឲ្យបានដឹងឮ រីឯកម្មការនី ឌឿន ចន្ធា ក៏បានត្រឡប់ ទៅស្រុកវិញ បាត់ទៅ។
លោក ប៊ុន ផេង បានបញ្ជាក់ប្រាប់ផងថាក្រោយពីទទួលបានភ្លាមៗអាជ្ញាធរបានទំនាក់ទំនង រួចហើយបញ្ជូនកម្មការនីរូបនេះទៅយកសំណាក ហើយជាលទ្ធផលកម្មការនីរូបនេះ ពិតជាមានវិជ្ជមានកូវីដ-១៩ ពិតមែន ហើយត្រូវដាក់ឲ្យសម្រាកព្យាបាល នៅឯ ខេត្តព្រៃវែង។
ជាមួយគ្នានោះ អាជ្ញាធរ ស្រុកខ្សាច់ កណ្ដាល ក៏បានរកឃើញ ក្រុម កម្មការនី រោងចក្រ កាត់ដេរ Starlight apparel manufacturing co.,ltd ដែលពាក់ព័ន្ធ ពិសេសជិះរថយន្តជាមួយគ្នាសរុបចំនួន ៨៨ តម្រូវឱ្យទៅយកសំណាក រួចរាល់ និងដាក់ឲ្យ ធ្វើចត្តាឡីស័ក។
ពាក់ព័ន្ធក្នុងរឿងនេះ លោក ហ៊ី ធួក អភិបាលស្រុកពារាំង បានឱ្យដឹងថា អាជ្ញាធរស្រុកពារាំងបានរក ឃើញថា អ្នកដែលបានប៉ះពាល់ ដោយផ្ទាល់ និងប្រយោល ជាមួយ កម្មការនី ឌឿន ចន្ធា សរុប ៩៣ នាក់ ក្នុងនោះកម្មករកាត់ដេរ ៦៣ នាក់ ត្រូវដាក់ឲ្យធ្វើចត្តាឡីស័កនៅតាមសាលា រៀន នៃស្រុកពារាំង និងពលរដ្ឋ ៣០ នាក់ទៀត កំពុងដាក់ឲ្យធ្វើ ចត្តាឡីស័ក នៅតាមផ្ទះ ដែលមានការយាមកាម ដោយកម្លាំងសមត្ថកិច្ច និងអាជ្ញាធរមូលដ្ឋាន៕
