ខេត្តកណ្តាល៖ យុទ្ធនាការនៃចាក់វ៉ាក់សាំងការពារមេរោគកូវីដ-១៩ ដូសទី២ ប្រភេទស៊ីណូហ្វាម នៅថ្ងៃទី១ជូនដល់ក្រុមគ្រួសារកងទ័ព នៅទីបញ្ជាការតំបន់ប្រតិបត្តិការសឹករងកណ្តាលបានជាង៥០០នាក់។ នេះបើតាមការបញ្ជាក់ ពីឯកឧត្តម ឧត្តមសេនីយ៍ត្រី នៃ និយម មេបញ្ជាការតំបន់ប្រតិបត្តិការសឹករងកណ្តាល ក្នុងឱកាសអញ្ជើញត្រួតពិនិត្យក្រុមការងារចាក់វ៉ាក់សាំងនៅទីបញ្ជាការនៅព្រឹកថ្ងៃទី២៤ ខែមេសា ឆ្នាំ២០២១នេះ។

ក្រុមគ្រួសារកងទ័ព ដែលបានទទួលបានការចាក់វ៉ាក់សាំងការពារមេរោគកូវីដ-១៩ដូសទី២នៅទីបញ្ជាការតំបន់ប្រតិបត្តិការសឹករងកណ្តាល បានថ្លែងអំណរគុណយ៉ាងជ្រាលជ្រៅជាទីបំផុតដល់រាជរដ្ឋាភិបាលកម្ពុជា ពិសេសសម្តេចតេជោ ហ៊ុន សែនានាយករដ្ឋមន្រ្តី ដែលបានខិតខំស្វែងរកវ៉ាក់ការពារជំងឺកូវីដ-១៩ ចាក់ជូនប្រជាពលរដ្ឋ។

នៅក្នុងឱកាសនេះដែរ ឯកឧត្តម ឧត្តមសេនីយ៍ត្រី នៃ និយម បានក្រើនរំលឹកក្រុមការងារទាំងអស់ ត្រូវរៀបចំសណ្ដាប់ធ្នាប់ឲ្យបានល្អ ពិសេសវិធានការសុខាភិបាល រក្សាគម្លាតសុវត្ថិភាពបុគ្គល និងតម្រូវឲ្យ ពាក់ម៉ាស់ឲ្យបានគ្រប់គ្នា ដើម្បីជៀសវាងហានិភ័យដែលអាចកើតមានឡើង។

យោងតាមផែនការនៃការចាក់វ៉ាក់សាំងបង្ការជំងឺកូវីដ-១៩ ដូសទី២ ជូនកងទ័ព និងគ្រួសារកងទ័ព ដែលស្ថិននៅភូមិសាស្រ្តខេត្តកណ្តាល របស់ក្រុមការងារចាក់វ៉ាក់សាំងកូវីដ១៩ យោធភូមិភាគពិសេស ចាប់ពីថ្ងៃទី២៤ ដល់ថ្ងៃទី២៩ មាន៤គោលដៅ រួមមានដូចជា៖

– គោលដៅទី១ នៅទីបញ្ជាការតំបន់ប្រិតបត្តិការសឹករងកណ្តាល ត្រូវមកចាក់នៅគោលដៅនេះ មាន៣ស្រុក ក្រុង (ក្រុងតាខ្មៅ, ស្រុកកោះធំ, ស្រុកស្អាត)និង វរៈសេនាតូចលេខ១ កង៦០១ ចាប់ដំណើរពីថ្ងៃទី២៤ ដល់ថ្ងៃទី២៩ ខែមេសា ឆ្នាំ២០២១

– គោលដៅទី២ នៅផ្នែកសឹករងអង្គស្នូល មកចាក់នៅគោលដៅនេះ មាន៣ស្រុក (ស្រុកកណ្តាលស្ទឹង, ស្រុកអង្គស្នូល, ស្រុកពញាឮ) ចាប់ដំណើរពីថ្ងៃទី២៥ ដល់ថ្ងៃទី៣០ ខែមេសា ឆ្នាំ២០២១

– គោលដៅទី៣ នៅសាលាអនុវិទ្យាល័យព្រះសីហនុរាជ ឃុំព្រែកតាមាក់ ស្រុកខ្សាច់កណ្តាលៈ មកចាក់នៅគោលដៅនេះមាន៣ស្រុក (ស្រុកខ្សាច់កណ្តាល, ស្រុកមុខកំពូល, និងស្រុកល្វាឯម) ចាប់ដំណើរពីថ្ងៃទី២៦ ដល់ថ្ងៃទី០១ខែឧសភា ឆ្នាំ២០២១

– គោលដៅទី៤ នៅផ្នែកសឹករងកឿនស្វាយៈ មកចាក់នៅគោលដៅនេះមាន២ស្រុក (ស្រុកលើកដែក ស្រុកគៀនស្វាយ) ចាប់ដំណើរពីថ្ងៃទី២៧ដល់ថ្ងៃទី០២ ខែឧសភា ឆ្នាំ២០២១

សូមជម្រាបថា ការចាក់ថ្នាំការពារជំងឺកូវីដ-១៩ (ដូសទី២) ជូនគ្រួសារយោធិននេះ មានរយៈពេល៥ថ្ងៃគឺចាប់ពីថ្ងៃទី២៤ ខែមេសា ឆ្នាំ២០២១នេះតទៅ តាមគោដៅដែលបានកំណត់ខាងលើនេះ។ ការចាក់វ៉ាក់សាំងការពារជំងឺកូវីដ-១៩ ទាំង ០៤ទីតាំងខាងលើនេះ ក្នុងគ្រាដែលប្រទេសកម្ពុជា បានបិទខ្ទប់ភូមិសាស្រ្ត រាជធានីភ្នំពេញ និងក្រុងតាខ្មៅ ខេត្តកណ្តាល៕