ទំហំពាណិជ្ជកម្ម ឬ ការនាំចេញនាំចូលរបស់ចិន រយៈពេល ៤ ខែដំបូងដើមឆ្នាំ២០២១ បានកើនឡើង ២៨,៥ ភាគរយបើប្រៀបធៀបនឹងរយៈពេលដូចគ្នានៃឆ្នាំមុន កើនឡើងខណៈសេដ្ឋកិច្ចពិភពលោកផ្តើមងើបវិញបណ្តើរៗ និងតម្រូវការសេវាកម្មនិងផលិតផលកើនឡើងខ្លាំងក្លាដែរ នេះបើតាមទីភ្នាក់ងារសារព័ត៌មានស៊ីនហួរ នាថ្ងៃទី៧ ឧសភា ២០២១នេះ។

ប្រភពបន្តថា ដំណើរការផលិតនៅចិនកំពុងវិវឌ្ឍន៍ល្អប្រសើរ ហើយការនាំចូលក៏ដូច្នោះដែរ។

អគ្គនាយកដ្ឋានគយចិនបានចេញផ្សាយទិន្នន័យស្ថិតិនៅថ្ងៃទី៧ ខែឧសភាថា នៅ៤ ខែដំបូងដើមឆ្នាំ២០២១នេះ ប្រទេសចិនបាននាំចេញនាំចូលទំនិញពាណិជ្ជកម្មសរុប១១,៦២ ទ្រីលានយាន់ ឬ ១.៨ទ្រីលានដុល្លារអាមេរិក ដែលបានកើនឡើង ២៨,៥ ភាគរយបើប្រៀបធៀបនឹងរយៈពេលដូចគ្នានៃឆ្នាំមុន ព្រមនិងបានកើនឡើង ២១,៨ ភាគរយបើប្រៀបធៀបនឹងរយៈពេលដូចគ្នានៃឆ្នាំ២០១៩។ ក្នុងនោះ ការនាំចេញមានទំហំ ៦,៣២ ទី្រលានយាន់ ដែលបានកើនឡើង ៣៣,៨ ភាគរយបើប្រៀបធៀបនឹងរយៈពេលដូចគ្នានៃឆ្នាំមុន ព្រមនិងបានកើនឡើង ២៤,៨ ភាគរយបើប្រៀបធៀបនឹងរយៈពេលដូចគ្នានៃឆ្នាំ២០១៩។

ចំណែកការនាំចូលមានទំហំ ៥,៣ ទ្រីលានយាន់ ដែលបានកើនឡើង ២២,៧ ភាគរយបើប្រៀបធៀបនឹងរយៈពេលដូចគ្នានៃឆ្នាំមុន និងបានកើនឡើង ១៨,៤ ភាគរយបើប្រៀបធៀបនឹងរយៈពេលដូចគ្នានៃឆ្នាំ២០១៩៕