វ៉ាក់សាំង AstraZeneca ជើងទី២ ចំនួនជិត១.៧លានដូស ក្រោមយន្តការកូវ៉ាក់នៃអង្គការសុខភាពពិភពលោកត្រូវបានបញ្ជូនទៅដល់ក្រុងហាណូយប្រទេសវៀតណាមហើយ នាថ្ងៃអាទិត្យ ទី១៦ ឧសភា ២០២១នេះ។

វៀតណាមថា នេះគឺផ្នែកមួយទៀតនៃជំនួយពីកូវ៉ាក់ចំនួនសរុប ៤.១លានដូស។ ជើងទី១ បញ្ជូនមក កាលពីខែមីនា។ វៀតណាមក៏ទិញវ៉ាក់សាំងអង់គ្លេសនេះដែរ ក្រៅពីជំនួយមិនគិតថ្លៃនោះ។ ជាក់ស្តែង វ៉ាក់សាំងប្រភេទនេះជាង១១ម៉ឺនដូសក៏ត្រូវបានបញ្ជូនមកដល់វៀតណាម តាមការបញ្ជាទិញដែរ កាលពីខែកុម្ភៈ ២០២១ ដោយគេដឹងថា វៀតណាមកម្មង់ទិញដល់ទៅ៣០លានដូស។

វៀតណាមបានផ្តើមចាក់ AstraZeneca នេះជូនពលរដ្ឋ តាំងពីខែមីនា តែទើបចាក់បានប្រមាណ១ភាគរយប៉ុណ្ណោះ គឺជាង៩៧ម៉ឺននាក់ លើក្រុមអាទិភាពសិន ហើយអ្នកចាក់ដូសទី២ ទើបបានជាង២ម៉ឺននាក់៕