ប្រមុខការទូតអាមេរិកប្រកាសថា សហរដ្ឋអាមេរិកនឹងផ្តល់ជំនួយដល់តំបន់ហ្គាហ្សា ហើយប្តេជ្ញាបើកស្ថានកុងស៊ុលនៅទីក្រុងហ្សេរុយសាឡឹមឡើងវិញ
អាមេរិក៖ អំឡុងដំណើរទស្សននៅតំបន់មជ្ឈឹមបូព៌ា រដ្ឋមន្ត្រីការបរទេសអាមេរិក លោក អាន់ថូនី ប្លីងខិន បានសន្យាស្ថាបនាទំនាក់ទំនងរវាងសហរដ្ឋអាមេរិក និងប៉ាឡេស្ទីនឡើងវិញ តាមរយៈការបើកស្ថានកុងស៊ុលមួយឡើងវិញនៅទីក្រុងហ្សេរុយសាឡឹម ក៏ដូចជាផ្តល់ជំនួយរាប់លានដុល្លារ ដើម្បីជួយតំបន់ហ្គាំហ្សា ស្ទ្រីប ដែលខ្ទេចខ្ទាំដោយសារសង្គ្រាម ។
ការប្រកាសខាងលើនេះ បានផ្តល់សញ្ញាអំពីការបញ្ចប់គោលនយោបាយសហរដ្ឋអាមេរិកក្រោមការដឹកនាំរបស់ប្រធានាធិបតីអាមេរិកលោក ដូណាល់ ត្រាំ ដែលបានបិទស្ថានបេសកកម្មការទូតសម្រាប់ប៉ាឡេស្ទីននៅឆ្នាំ២០១៩ និងកាត់បន្ថយជំនួយមកអោយអាជ្ញាធរប៉ាឡេស្ទីន ។ បន្ទាប់ពីជួបប្រជុំជាមួយប្រធានាធិបតីប៉ាឡេស្ទីនលោក ម៉ាមូត អាប់បាស់ នៅក្នុងទីក្រុងរ៉ាម៉ាឡា ប្រមុខការទូតអាមេរិករូបនេះក៏បានអះអាងឡើងវិញអំពីការគាំទ្រសិទ្ធិរបស់អ៊ីស្រាអែល ក្នុងការការពារខ្លួនទប់ទល់នឹងការវាយប្រហារដោយរ៉ុក្កែត របស់ក្រុមហាម៉ាស់ ។
តែលោក ប្លីងខិន ក៏បានបញ្ជាក់អំពីការប្តេជ្ញាចិត្តរបស់រដ្ឋាភិបាលទីក្រុងវ៉ាស៊ីនតោន ក្នុងការស្ថាបនាទំនាក់ទំនងជាមួយប៉ាឡេស្ទីនឡើងវិញ ជាមួយនឹងទស្សនៈដែលថា ប៉ាឡេស្ទីន ក៏ដូចជាអ៊ីស្រាអែលសមនឹងទទួលបានវិធានការសន្តិសុខ ឱកាសសេរីភាព និងសេចក្តីថ្លៃថ្នូរដូចៗគ្នា ៕ ប្រភព៖ Reuters
