បងប្អូនប្រជាពលរដ្ឋនៅក្នុងឃុំមេលំ បានសាមគ្គីគ្នា កសាងទំនប់ស្ទាក់ទឹក នៅចំណុចទំនប់កិល បានជោគជ័យ៨០ ភាគរយហើយ ក្នុងស្រុកបរិបូណ៌
ដោយសារតែកម្លាំង និងថវិកាសាមគ្គីគ្នា រវាងភូមិមេលំ និងភូមិកាន់យួរ ក្នុងឃុំមេលំ ស្រុកបរិបូណ៌ ការកសាងទំនប់ស្ទាក់ទឹកបង្វែរទិស យកមកស្រោចស្រពស្រែប្រាំង ក្នុងពេល២ឆ្នាំ បានទទួលជោគជ័យប្រមាណ 80 ភាគរយ នេះបើតាមការបញ្ជាក់របស់អាជ្ញាធរឃុំមេលំ នៅព្រឹកថ្ងៃទី 28 ខែឧសភាឆ្នាំ 2021នេះ។
លោក កេត សុឃា មេឃុំមេលំ បានបញ្ជាក់ថា រយ:ពេល2ឆ្នាំ ដែលប្រជាពលរដ្ឋរស់នៅភូមិមេលំ និង ភូមិកាន់យួរ បានសហការគ្នាកសាងទំនប់ស្ទាក់ទឹក ដើម្បីបង្វែរចូលប្រឡាយមេ យកទៅស្រោចស្រពស្រូវប្រាំងបានទទួលដោយជោគជ័យ ប្រមាណ៨០ភាគរយហើយ នៅប្រមាណ២០ភាគរយទៀត នឹងបញ្ចប់ការកសាងនៅឆ្នាំក្រោយ ។
លោកមេឃុំបានរំឮកថា កន្លងមកប្រជាពលរដ្ឋតែងតែប្រើកម្លាំងពលកម្ម កាប់ឬស្សី បោះធ្នួស ដើម្បីបញ្ចាល់ទឹកយកទៅ ស្រោចស្រព ផ្ទៃស្រែប្រាំង នៅផ្នែកខាងក្រោម ទំហំ១៥៦៤ ហិកតា ប៉ុន្តែទំនប់នេះបានតែមួយឆ្នាំត្រូវខូចខាតនិងឆ្នាំក្រោយធ្វើថ្មីវិញ។
ក្រោយមកនៅឆ្នាំ ២០២០ និងឆ្នាំ ២០២១ រយ:ពេល២ឆ្នាំ ពួកគាត់បានរៃថវិកាគ្នាកសាងទំនប់ទាក់ទឹកដោយធ្វើពីបេតុងរឹងមាំ ប្រើប្រាស់យូរអង្វែង ដោយប្រើប្រាស់ថវិកាសរុបទាំង២ឆ្នាំ ប្រមូលបាន២៦៥៣៥ ដុល្លារ ដែលបានពីការរៃអង្គាសប្រជាពលរដ្ឋ ដែលមានស្រែប្រាំងក្នុងភូមិមេលំ១២៥គ្រួសារ និងភូមិកាន់យួរ ១៣២គ្រួសារ ដោយ១គ្រួសារៗ ថវិកាចំនួន១០ម៉ឺនរៀល ។
លោកមេឃុំ បានថ្លែងអំណរគុណដល់បងប្អូនប្រជាពលរដ្ឋទាំង២ភូមិ ដែលបានសហការគ្នាទាំងថវិកានិងកម្លាំងពលកម្ម ដើម្បីរួមគ្នាកសាងទំនប់ស្ទាក់ទឹកមួយនេះ ដែលមិនត្រឹមតែបំរើឲ្យប្រជាពលរដ្ឋតែ២ ភូមិ ក្នុងឃុំមេលំនោះទេ គឺមានប្រជាពលរដ្ឋរស់នៅឃុំផ្សារ និងឃុំកំពង់ព្រះគគីរ ក៏ប្រើប្រាស់ទឹកប្រឡាយនេះដែរ ៕សុខ គឹមសៀន
