ចិនផ្តល់អំណោយវ៉ាក់សាំងកូវីដជូនវៀតណាម ៥០ម៉ឺនដូស
វៀតណាមបានទទួលវ៉ាក់សាំង ស៊ីណូហ្វាម ចំនួន៥សែនដូស ដែលបានបរិច្ចាគដោយប្រទេសចិន បញ្ជូនទៅដល់ហាណូយហើយ កាលពីថ្ងៃទី២០ មិថុនាម្សិលមិញ។
ពិធីប្រគល់និងទទួលក្រោមអធិបតីភាព រដ្ឋមន្ត្រីសុខាភិបាលវៀតណាម Thanh Long និងឯកអគ្គរដ្ឋទូតចិនប្រចាំវៀតណាម Xiong Bo ។
ភាគីវៀតណាមបាននិយាយថា រដ្ឋាភិបាលនិងប្រជាជនវៀតណាមពិតជាអរគុណដោយស្មោះចំពោះជំនួយវ៉ាក់សាំងនេះ។ លោក Thanh Long បន្តថា វៀតណាមសន្យាថា នឹងពន្លឿនការចាក់វ៉ាក់សាំង ឲ្យបានលឿននិងសុវត្ថិភាព រួមទាំងការចាក់ជូនពលរដ្ឋចិននៅវៀតណាម ពលរដ្ឋវៀតណាមចង់ទៅចិន និងប្រជាពលរដ្ឋរស់នៅតាមព្រំដែនប្រទេសទាំងពីរ។
លោក Xiong Bo បានលើកឡើងថា ជំនួយនេះគឺជាសកម្មភាពដ៏សំខាន់ចូលរួមពង្រឹងកិច្ចសហប្រតិបត្តិការរវាងបក្ស និងប្រទេសទាំងពីរ ជារូបភាពច្បាស់លាស់នៃភាពជាដៃគូសហប្រតិបត្តិការយុទ្ធសាស្ត្រគ្រប់ជ្រុងជ្រោយរវាងចិននិងវៀតណាម៕
