សេចក្តីរាយការណ៍បានបញ្ជាក់ថា ហេតុការណ៍នោះបានកើតឡើងកាលពីថ្ងៃទី២២ ខែមិថុនា ឆ្នាំ២០២១ នៅចំណុចទំនប់សង្កែសោម ស្ថិតក្នុងភូមិពោធិតាប៉ាង ឃុំស្វាយប្រទាល ស្រុកស្អាង ខេត្តកណ្តាល ។ សមត្ថកិច្ចបានបញ្ជាក់អោយដឹងថា បុរសទាំង២នាក់ដែលស្លាប់មានឈ្មោះ ម៉ាត់ នសា អាយុ២៨ឆ្នាំ មុខរបរ នេសាទ និងឈ្មោះ ស៊េន ម៉ាអ៊ែល អាយុ១៦ឆ្នាំ មុខរបរនេសាទ។

សមត្ថកិច្ចបានអោយដឹងថា នៅថ្ងៃទី២២ ខែមិថុនា ឆ្នាំ២០២១ បុរសជនរងគ្រោះទាំង២នាក់បានទៅទាក់សត្វជាមួយនិងឪពុក។ ខណៈពេលមានភ្លៀងធ្លាក់និងខ្យល់ ជនរងគ្រោះបាននាំគ្នាទៅជ្រកទឹកភ្លៀងនៅក្រោមដើមកាស្យា ភ្លាមនោះ ក៏ត្រូវរន្ទះបាញ់ បានបាញ់ចំដើមកាស្យាបណ្តាលអោយជនរងគ្រោះទាំងពីនាក់ស្លាប់ នៅកន្លែងកើតហេតុ។

គិតក្នុង រវាងខែមេសា, ឧសភានិងមកត្រឹមថ្ងៃទី២៣ខែមិថុនានេះ តួលេខមិនទាន់ផ្លូវការ បានបង្ហាញថា ករណីរន្ទះបាញ់ បានសម្លាប់មនុស្ស២០នាក់, ធ្វើឲ្យរបួស ១២នាក់, ស្លាប់គោក្របី១១ក្បាល ក្នុងហេតុការណ៍កើតឡើងក្នុង ខេត្ត ចំនួន១០ គឺ ខេត្តកណ្តាល ,ខេត្តមណ្ឌលគីរី, កំពង់ឆ្នាំង, សៀមរាប, ព្រៃវែង, កំពង់ធំ, ខេត្តបាត់ដំបង, កំពង់ស្ពឺ, ខេត្តក្រចេះ និងខេត្តពោធិ៍សាត់។