សម្តេចតេជោនាយករដ្ឋមន្ត្រី សម្រេចឱ្យក្រុមហ៊ុនឯកជនអាចទិញឧបករណ៍តេស្តរហ័សរកកូវីដ១៩ សម្រាប់ធ្វើតេស្តបុគ្គលិកកម្មកររបស់ខ្លួន
ភ្នំពេញ៖ សម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជាបានអំពាវនាវទៅកាន់ក្រុមហ៊ុនឯកជនទាំងអស់នៅក្នុងប្រទេសកម្ពុជា ត្រូវទិញឧបករណ៍តេស្តរហ័សសម្រាប់ធ្វើតេស្តបុគ្គលិកកម្មកររបស់ខ្លួន។ ជាមួយគ្នានេះ សម្តេចតេជោ ហ៊ុន សែន ក៏បានចេញបទបញ្ជាឲ្យកងទ័ពនគរបាល និងអាវុធហត្ថ ក៏ត្រូវមានឧបករណ៍តេស្តរហ័សនៅក្នុងដៃជាចាំបាច់ ដោយមិនចាំបាច់ក្រុមគ្រូពេទ្យទើបអាចធ្វើតេស្តនោះទេ។ ជាមួយនេះ សម្តេចបានបញ្ជាឱ្យក្រសួងសុខាភិបាលត្រូវចុះទៅបង្រៀនក្រុមហ៊ុន និងកងទ័ព នគរបាល អាវុថហត្ថ ឱ្យចេះប្រើឧបករណ៍នេះ។ ដោយសម្តេចលើកឡើងថា យើងមិនអាចនៅពេលមានករណីសង្ស័យកើតឡើងហើយរង់ចាំគ្រូពេទ្យទៅយកសំណាកនោះទេ។
សម្តេចតេជោ ហ៊ុន សែន បានថ្លែងបែបនេះនៅក្នុងកិច្ចប្រជុំគណៈកម្មការជាតិប្រយុទ្ធប្រឆាំងនឹងជំងឺកូវីដ១៩ នៅព្រឹកថ្ងៃទី០១ ខែកក្កដា ឆ្នាំ២០២១តាមប្រព័ន្ធ វីដេអូ ដើម្បីពិភាក្សានិងដោះស្រាយទៅលើបញ្ហាជំងឺកូវីដ១៩ ដែលកំពុងរីករាលដាលនៅក្នុងប្រទេសកម្ពុជា។
សម្តេចតេជោ ហ៊ុន សែន បានមានប្រសាសន៍ថា ការពង្រីកការធ្វើតេស្តរហ័សជាចំណុចដែលសម្តេចធ្វើការសម្រេចចិត្តជំនួសឱ្យរដ្ឋមន្ត្រីសុខាភិបាលដែលកន្លង ទៅនៅស្ទាក់ស្ទើររង់ចាំដល់តែពេទ្យទើបអាចធ្វើតេស្តបាន។ សម្តេចបានលើកឡើងថាពេទ្យនៅតាមស្រុកខ្លះមានតែ៥នាក់ ប្រជាជនមានរហូត១០ម៉ឺននាក់តើអាចទៅរួចទេ។ សម្តេចតេជោនាយករដ្ឋមន្ត្រីបានបន្តថា ថ្ងៃនេះខ្ញុំយកការសម្រេចមួយផ្តល់សិទ្ធិឱ្យក្រុមហ៊ុនឯកជនអាចធ្វើតេស្តលើបុគ្គលិករបស់គេ។ រដ្ឋត្រូវធ្វើហើយកំពុងធ្វើ រាល់ថ្ងៃប៉ុន្តែយើងត្រូវបើកឱកាសឱ្យក្រុមហ៊ុនឯកជនដើម្បីក្រុមហ៊ុនឯកជន គេអាចគ្រប់គ្រងលើបុគ្គលិករបស់គេបានឆាប់រហ័ស។ អ៊ីចឹងក្រុមហ៊ុនឯកជនទាំងអស់ត្រូវគ្រប់គ្រងបុគ្គលិកកម្មកររបស់ខ្លួនពេលមានបញ្ហាត្រូវធ្វើតេស្តលើបុគ្គលិករបស់ខ្លួនតែម្ដង។
សម្តេចបានឱ្យដឹងផងដែរថា ការបញ្ជាទិញឧបករណ៍តេស្តរហ័សនេះអាចទាក់ទងតាមលោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ដែលជាផលិតផលរបស់សាធារណរដ្ឋកូរ៉េ ដែលមានតម្លៃថោកសមរម្យមួយតម្លៃ ៣.៧ ដុល្លារតែប៉ុណ្ណោះ។ ដូច្នេះក្រុមហ៊ុននីមួយៗអាចទិញក្នុងរង្វង់១០០០ ទៅ ២០០០គ្រឿង ដើម្បីធ្វើតេស្តទៅលើកម្មកររបស់ខ្លួននៅពេលដែលមានបញ្ហាសង្ស័យកើតឡើង។
សម្តេចបន្តថាយើងមិនអាចរវល់តែទាក់ទងទៅគ្រូពេទ្យឬគ្រូពេទ្យទាក់ទងទៅសុំយោបល់មន្ត្រីនោះទេគឺវាយូរណាស់ការរីករាលដាលនៅក្នុងរោងចក្រក៏កាន់តែច្រើនដូច្នេះការគ្រប់គ្រងបញ្ហាកូវីដ១៩គឺត្រូវផ្ដល់ឱ្យការធ្វើតេស្តដល់ក្រុមហ៊ុននីមួយៗ។ហើយក្រសួងសុខាភិបាលត្រូវចុះទីបង្រៀនដល់ក្រុមហ៊ុននិងរោងចក្រនិមួយៗ ឲ្យចេះវិធីយកសំណាកធ្វើតេស្តនេះ ។
សម្តេចតេជោ ហ៊ុន សែន បានលើកជាសំណួរទៅកាន់រដ្ឋមន្ត្រីសុខាភិបាលថា តើវាខាតអីសម្រាប់យើងប្រសិនបើគាត់ធ្វើតេស្តខ្លួនឯងវាមិនមានការខាតបង់អ្វីទាំងអស់ ,មានតែចំណេញទីមួយគាត់ស្ម័គ្រចិត្តធ្វើតេស្តខ្លួនឯង,នៅពេលគាត់រកឃើញជំងឺគាត់ទៅរកពេទ្យ។ បើគាត់រកមិនឃើញទេអត់មានការខាតបង់អ្វីទាំងអស់ហេតុអ្វីយើងមិនឱ្យគេធ្វើតេស្ត។ យើងមិនមានខាតបង់ទេគឺយើងធ្វើប្រជាពលរដ្ឋរបស់យើងអាចចេះការពារខ្លួនហេតុអ្វីយើងមិនបណ្ដោយឱ្យគេធ្វើ?។ ចាំតែគ្រូពេទ្យទើបធ្វើបាន ។
ជាមួយគ្នានេះសម្តេចតេជោ ហ៊ុន សែន ក៏បានបញ្ជាឲ្យកងទ័ពនគរបាល និងអាវុធហត្ថត្រូវមានឧបករណ៍ធ្វើតេស្តរហ័សដើម្បីរកឃើញភ្លាមៗ។ សម្តេចបន្តថានៅ ពេលដែលឧបករណ៍ធ្វើតេស្តរហ័សដែលបញ្ជាទិញមកដល់ត្រូវចែកទៅឱ្យកងយោធពលខេមរភូមិន្ទដើម្បី កងទ័ពចែកទៅតាមបណ្ដាយុទ្ធភូមិភាគ បណ្ដាលកងពល បណ្ដាកងវរសេនាតូច អាវុធហត្ថ ប៉ុស្តិ៍នគរបាល ស្នងការក៏ត្រូវតែមាន។
សម្តេចតេជោបន្តថាយុទ្ធសាស្ត្ររបស់យើងការពារកូវីដ១៩នេះគឺរកឃើញបានលឿនគ្រប់គ្រងបានលឿនមិនឲ្យឆ្លងរាលដាលគឺជាវិធីដ៏ល្អ ។ ប៉ុន្តែកន្លងមកយើង គ្រាន់តែបាននិយាយតែមិនបានអនុវត្តជាក់ស្ដែង ពេលនេះខ្ញុំនិយាយឱ្យអនុវត្តជាក់ស្ដែងតែម្ដង ។ ខ្ញុំនិយាយឲ្យប្រជាជនស្តាប់ថាក្នុងរដ្ឋាភិបាលមិនមែនជារឿង ធម្មតាពេកទេ ។ «មិនមែនសុកក៏អ៊ឺ សៅរ៍ក៏អ៊ឺ នោះទេ»។
សម្តេចតេជោ ហ៊ុន សែន បានបន្តថាក្រសួងសុខាភិបាលត្រូវបង្រៀនក្រុមហ៊ុនឱ្យចេះក្នុងការធ្វើតេស្តរហ័សដោយផ្ដល់នូវសម្លៀកបំពាក់ដល់ពួកគេផង។ ម្ចាស់ក្រុមហ៊ុន,ម្ចាស់សហគ្រាសគប្បីទិញឧបករណ៍តេស្តរហ័សដោយថវិកាក្រុមហ៊ុនផ្ទាល់ ដើម្បីកាត់បន្ថយការចំណាយរបស់រដ្ឋ។ សម្តេចបានឱ្យដឹងថា បច្ចុប្បន្នរដ្ឋមានឧបករណ៍នេះនៅក្នុងស្តុកចំនួនមួយលានបួនសែនយើងអាចចែកទៅកងទ័ពនគរបាល និងអវុធហត្ថ។ ដូច្នេះក្រុមហ៊ុនត្រូវតែមានដើម្បី មានបញ្ហាគឺយើង ធ្វើតេស្តភ្លាមរកឃើញហើយអាចកាត់បន្ថយការឆ្លងបានរហ័ស។ អ៊ីចឹងខ្ញុំចេញជាបញ្ជាតែម្ដងដោយមិនរង់ចាំមានការឯកភាពពីរដ្ឋមន្ត្រីក្រសួងសុខាភិបាលទេ ព្រោះវាគ្មានអ្វីត្រូវខាតបង់នោះទេ។ សម្តេចបន្តថា វាគ្មានអីពិបាកនោះទេហើយយើងនិយាយគ្នាក៏វាច្រើនណាស់ហើយ តែយើងនៅតែឱបក្រសោបការងារ,ឱបក្រសោបទាំងសម្ភារទៀត។ សម្តេចបន្តថា «ខេត្តមួយថ្ងូរហឹមសុំឧបរណ៍តេស្តរហ័ស២០០០ឱ្យទៅ១០០០ធ្វើតែមួយថ្ងៃអស់បាត់សុំទៀតអស់តែថ្លៃសាំងឡាន ឡើងមកយក ចំណុចនេះសម្តេចបានផ្តាំទៅមន្ត្រីសុខាភិបាលថាត្រូវចាំកន្លែងនេះ កុំភ្លេចខេត្ត ហើយខេត្តបើមានបញ្ហាដាក់ចូលក្នុងគ្រូបធំ គណៈកម្មាធិការជាតិ តែម្ដងប្រាប់ថាអស់តេស្តរហ័សហើយ អស់ថ្នាំពេទ្យហើយ ឱ្យឃើញគ្រប់គ្នាតែម្ដងទៅ»៕
ដោយ៖ជម្ពូនុទ
