ធនាគារពិភពលោក នឹងបង្កើនការផ្តល់មូលនិធិវ៉ាក់សាំងកូវីដ-១៩ ដល់ទៅ ២០ ពាន់លានដុល្លារ
ធនាគារពិភពលោក (World Bank) នៅថ្ងៃពុធនេះ បានសន្យាថា នឹងបង្កើនមូលនិធិ សម្រាប់ការទិញវ៉ាក់សាំងកូវីដ-១៩ និងបង្កើនកញ្ចប់មូលនិធិដល់ទៅ ២០ ពាន់លានដុល្លារច្រើនជាងគោលដៅមុនៗ ដែលមានត្រឹម ១២ ពាន់លានដុល្លារ ដោយតម្រូវការហិរញ្ញប្បទានពីប្រទេសកំពុងអភិវឌ្ឍន៍កំពុងកើនឡើងខ្លាំង។
ប្រធានធនាគារពិភពលោក លោក David Malpass និយាយថា ធនាគារអភិវឌ្ឍន៍ពិភពលោក បានផ្តល់ថវិកាជាង ៤ ពាន់លានដុល្លារដល់ប្រទេសកំពុងអភិវឌ្ឍន៍ចំនួន ៥១ ប្រទេសសម្រាប់ទិញ និងចែកចាយវ៉ាក់សាំងទូទាំងពិភពលោក ហើយគ្រោងនឹងបន្ថែមប្រាក់រាប់ពាន់លានដុល្លារទៀតសម្រាប់ ២៥ ប្រទេសបន្ថែមទៀតក្នុងពេលឆាប់ៗនេះ។
លោក Malpass បានប្រាប់អ្នកយកព័ត៌មានថា៖ «មានផែនការជាច្រើនទៀត ដែលនឹងត្រូវអនុវត្តនៅប៉ុន្មានសប្តាហ៍ខាងមុខនេះ» ដោយលោកបានលើកឡើងអំពីសំណើសរុបចំនួន ៤១ ច្បាប់ទៀត ដែល ទទួលពីបណ្តាប្រទេសអាហ្វ្រិក ដែលប្រជាជនតិចជាងពាក់កណ្តាលនៅប្រទេសនេះទើបទទួលបាន វ៉ាក់សាំង។
នៅក្នុងសេចក្តីថ្លែងការណ៍រួមមួយ ធនាគារពិភពលោក មូលនិធិរូបិយវត្ថុអន្តរជាតិ និងអង្គការសុខភាពពិភពលោក បានជំរុញឱ្យក្រុមប្រទេសសេដ្ឋកិច្ចនាំមុខ ឬG20 ត្រូវសម្រេចចាក់វ៉ាក់សាំងដល់ ប្រជាជនគោលដៅយ៉ាងហោចណាស់ ៤០ ភាគរយនៅចុងឆ្នាំ ២០២១ និងឱ្យបាន ៦០ ភាគរយនៅពាក់កណ្តាលឆ្នាំ ២០២២ ។
ប្រភពដដែលនេះ ក៏បានជំរុញឱ្យប្រទេសសេដ្ឋកិច្ច G20 ធ្វើជំនួបគ្នានៅសប្តាហ៍ក្រោយនៅប្រទេសអ៊ីតាលី ដើម្បីអនុម័តគោលដៅចែករំលែកវ៉ាក់សាំងយ៉ាងតិច ១ ពាន់លានដូសឱ្យប្រទេសកំពុងអភិវឌ្ឍន៍នៅឆ្នាំនេះ និងបង្កើនហិរញ្ញប្បទាន និងលុបបំបាត់ឧបសគ្គពាណិជ្ជកម្មនៅក្នុងខ្សែសង្វាក់ផ្គត់ផ្គង់វ៉ាក់សាំងផងដែរ។
