អតីតប្រធានាធិបតីអាហ្រ្វិកខាងត្បូងលោក Jacob Zuma យល់ព្រមប្រគល់ខ្លួនឱ្យប៉ូលីស
អតីតប្រធានាធិបតីអាហ្រ្វិកខាងត្បូងលោក Jacob Zuma កាលពីថ្ងៃទី០៧ កក្កដា បានយល់ព្រមប្រគល់ខ្លួនលោកឱ្យប៉ូលីសដើម្បីចាប់ផ្ដើមអនុវត្តទោសជាប់ពន្ធធនាគារ ១៥ ខែពីបទប្រមាថតុលាការ បន្ទាប់ពីប៉ូលីសបានព្រមានថានឹងចាប់ខ្លួនលោកបើសិនជាមិនបង្ហាញខ្លួន។
លោក Zuma អាយុ ៧៩ ឆ្នាំ ត្រូវបានកាត់ទោសឱ្យជាប់ពន្ធនាគារកាលពីថ្ងៃទី ២៩ មិថុនា បន្ទាប់ពីលោកខកខានមិនបានចូលរួមក្នុងការស៊ើបអង្កេតអំពើពុករលួយក្នុងអំឡុងពេលប្រាំបួនឆ្នាំកាន់អំណាចរបស់លោកពីឆ្នាំ ២០០៩ ដល់ឆ្នាំ ២០១៨។ ការកាត់ទោសនេះ បានបង្កឱ្យមានរឿងល្ខោនផ្នែកច្បាប់នៅអាហ្វ្រិកខាងត្បូង ជាប្រទេសមិនធ្លាប់ឃើញអតីតប្រធានាធិបតីណាមួយជាប់គុកទេពីមុនមក។
ការប្រគល់ខ្លួននេះ ធ្វើឡើងតែមួយសប្តាហ៍ប៉ុណ្ណេះបន្ទាប់ពីភាពតានតឹងដែលលោក Zuma និងសម្ព័ន្ធមិត្តរបស់លោក បាននិយាយជំទាស់នឹងសេចក្តីសម្រេចរបស់តុលាការកំពូល ដោយលើកឡើងថាគ្មានភស្តុតាងច្បាស់លាស់។
លោក Zuma បានផ្តល់សក្ខីកម្មតែម្ដងគត់ នៅពេលសាកសួរអំពីអ្វីដែលត្រូវបានគេស្គាល់ថាជា «ការចាប់យករបស់រដ្ឋ» ដែលមានន័យថាយកទ្រព្យសម្បត្តិរដ្ឋ។ អ្នកជំនួញរូបនេះត្រូវបានគេចោទប្រកាន់ថា បានឃុបឃិតជាមួយអ្នកនយោបាយដើម្បីជះឥទ្ធិពលដល់ដំណើរការនៃការសម្រេចចិត្តផ្សែងៗនៅពេលលោកកំពុងកាន់តំណែង។ ប៉ុន្តែលោក Zuma បាននិយាយម្តងហើយម្តងទៀតថា លោកគឺជាជនរងគ្រោះនៃការសមគំនិតនយោបាយ។
ទោះបីជាលោក Zuma ត្រូវបានគេបង្ខំឱ្យចេញពីការិយាល័យដោយគណបក្សសមាជជាតិអាហ្រ្វិក (ANC)ដែលជាគណបក្សរបស់ខ្លួនកាលពីឆ្នាំ ២០១៨ ក្ដី ក៏អ្នកនយោបាយរូបនេះនៅតែរក្សាបាននូវក្រុមអ្នកគាំទ្រដ៏ស្មោះត្រង់ជាពិសេសនៅក្នុងខេត្ត KwaZulu-Natal ដែលជាស្រុកកំណើតរបស់លោក។
កាលពីថ្ងៃអាទិត្យ ក្រុមអ្នកគាំទ្រលោក Zuma បានប្រមូលផ្ដុំគ្នានៅខាងក្រៅផ្ទះរបស់លោក ក្នុងគោលបំណងដើម្បីរារាំងការចាប់ខ្លួនរបស់ប៉ូលីស។ ហ្វូងមនុស្សស្រដៀងគ្នានេះ បានប្រមូលផ្តុំគ្នាមុនពេលដែលអតីតប្រធានាធិបតីរូបនេះបានប្រកាសប្រគល់ខ្លួនកាលពីថ្ងៃពុធ។
លោក Zuma ធ្លាប់ជាឥស្សរជននយោបាយម្នាក់ ដែលធ្លាប់ជាប់គុកដោយសារតែការប្រយុទ្ធប្រឆាំងនឹងរបបប្រកាន់ពូជសាសន៍នៅអាហ្វ្រិកខាងត្បូង ហើយចៅក្រមជាន់ខ្ពស់បំផុតរបស់អាហ្រ្វិកខាងត្បូងដែលសម្រេចចោទប្រកាន់លោកពីបទប្រមាថតុលាការនេះហើយ ជាអាណាព្យាបាលនៃលទ្ធិប្រជាធិបតេយ្យ ដែលលោកធ្លាប់បានតស៊ូដើម្បីការពារ។
យ៉ាងណាមិញ ការចាប់ខ្លួនឥស្សរជនរូបនេះ ត្រូវបានគេមើលឃើញថាជារឿងដ៏មានមោទនភាពមួយសម្រាប់អាហ្វ្រិកខាងត្បូង ដោយព្រោះថាគ្មាននរណាម្នាក់នៅពីលើច្បាប់ទេ សូម្បីតែអតីតប្រធានាធិបតីក៏ដោយ។
កាលពីមុនលោកធ្លាប់បានប្រកាសរួចម្ដងហើយថា លោកបានរៀបចំនឹងទទួលទោសជាប់ពន្ធធនាគារ ប៉ុន្តែបាននិយាយថា៖ «បើឱ្យខ្ញុំជាប់គុកអំឡុងពេលប្រទេសកំពុងប្រឈមមុខនឹងជំងឺរាតត្បាត នៅអាយុរបស់ខ្ញុំនេះ ដូចកាត់ទោសប្រហារជីវិតខ្ញុំអញ្ចឹង»។
នៅក្នុងបញ្ហាផ្លូវច្បាប់ដាច់ដោយឡែកមួយទៀត លោក Zuma បានសារភាពកាលពីខែមុនថា ខ្លួនមិនមានកំហុសទេ ជុំវិញការជំនុំជម្រះក្តីប្រឆាំងអំពើពុករលួយពាក់ព័ន្ធនឹងកិច្ចព្រមព្រៀងទិញអាវុធចំនួន ៥ ពាន់លានដុល្លារពីទសវត្សឆ្នាំ ១៩៩០ ។ ហួន ឌីណា
