ប្រទេសហៃទី 🇭🇹 បានស្នើសុំជំនួយយោធាពីអង្គការសហប្រជាជាតិ (UN) និងអាមេរិក ដើម្បីការពារហេដ្ឋរចនាសម្ព័ន្ធនានារបស់ខ្លួន រួមមានអាកាសយានដ្ឋាន និងកំពង់ផែ ដែលពួកគេជឿជាក់ថានឹងក្លាយជាគោលដៅនៃការវាយប្រហារ បន្ទាប់ពីការធ្វើឃាតប្រធានាធិបតីលោក Jovenel Moise។ នេះបើតាម Reuters នៅថ្ងៃទី១០ កក្កដា។

សំណើរត្រូវបានលើកឡើងនៅក្នុងការសន្ទនារវាងនាយករដ្ឋមន្ត្រីបណ្តោះអាសន្ន Claude Joseph និងរដ្ឋមន្រ្តីការបរទេសអាមេរិក Antony Blinken កាលពីថ្ងៃពុធ។

រដ្ឋមន្ត្រីទទួលបន្ទុកកិច្ចការបោះឆ្នោតនៃប្រទេសហៃទី លោក Mathias Pierre បានបញ្ជាក់ថា ការស្នើសុំជំនួយយោធាអាចធានាបានថា ការបោះឆ្នោតប្រធានាធិបតី និងសភានៅថ្ងៃទី២៦ កញ្ញាខាងមុខនេះ អាចនឹងប្រព្រឹត្តទៅតាមការគ្រោងទុក។

ដោយឡែក អាមេរិកមិនទាន់ឯកភាពទេ តែសន្យាជួយលើការស៊ើបអង្កេត។ អង្គការសហប្រជាជាតិមិនទាន់សម្រេចចិត្តនៅឡើយទេ។

ការបាញ់សម្លាប់ប្រធានាធិបតីហៃទី ដោយក្រុមខ្មាន់កាំភ្លើងនៅព្រឹកថ្ងៃទី៧ កក្កដា បានធ្វើឱ្យហៃទីធ្លាក់កាន់តែជ្រៅទៅក្នុងវិបត្តិនយោបាយ ភាពអត់ឃ្លាន អំពើហឹង្សាជាក្រុម និងការផ្ទុះឡើងនៃជំងឺកូវីដ១៩។

ប្រភព៖ Reuters