ច្រើនជាង ១០០នាក់បានបាត់បង់ជីវិតក្នុងគ្រោះទឹកជំនន់នៅប្រទេសអាហ្វហ្គានីស្ថាន
យ៉ាងតិចមានមនុស្ស ១១៣នាក់បានបាត់បង់ជីវិត ដោយគ្រោះទឹកជំនន់នៅខេត្ត Nuristan ដែលស្ថិតនៅភាគខាងកើតប្រទេសអាហ្វហ្គានីស្ថាន ខណៈមនុស្សជាច្រើននាក់ទៀតកំពុងតែបាត់ខ្លួន នេះបើតាមតួលេខ ដែលផ្ដល់ដោយអាជ្ញាធរគ្រប់គ្រងគ្រោះមហន្តរាយរបស់រដ្ឋាភិបាលអាហ្វហ្គានីស្ថាន។
គ្រោះទឹកជំនន់កំពុងតែវាយប្រហារខេត្តភាគកើតជាប់នឹងព្រំដែនប៉ាគីស្ថាន ក្រោយពីភ្លៀងយ៉ាងធំមួយកាលពីថ្ងៃពុធសប្ដាហ៍មុន។ ខេត្តនេះស្ថិតក្រោមការគ្រប់គ្រងរបស់ក្រុមឧទ្ទាមតាលីបង់ ខណៈក្រុមសង្គ្រោះកំពុងតែធ្វើប្រតិបត្តិស្វែងរករបស់ខ្លួននៅក្នុងថ្ងៃអាទិត្យ។
អាជ្ញាធរគ្រប់គ្រងគ្រោះមហន្តរាយបានឱ្យដឹងថា ផ្ទះចំនួន ១៧០ខ្នងត្រូវបានកម្ទេចទាំងស្រុង ឬ កម្ទេចដោយផ្នែកណាមួយ ខណៈប្រជាជន ៣០០គ្រួសាររងការប៉ះពាល់ពីទឹកជំនន់នេះ។
ការដឹកជញ្ជូនជំនួយចាំបាច់មួយចំនួនដូចជា ស្បៀងអាហារ ជម្រកបណ្ដោះអាសន្ន ក៏ដូចជា ថ្នាំសង្កូវ មិនអាចធ្វើទៅបាន ក៏ព្រោះតែទឹកជំនន់កាត់ផ្ដាច់ស្ពានធំមួយនៅតំបន់នោះ ហើយនៅទីនោះទៀតសោតកំពុងកាន់កាប់ដោយក្រុមតាលីបង់៕
