ក្រុមហ៊ុនខែ្មរប៊ែវើរីជីស បរិច្ចាគទឹកបរិសុទ្ធកម្ពុជា ក្នុងថ្ងៃទី២ គឺថ្ងៃទី១៤ ខែកុម្ភៈ ឆ្នាំ២០២០ ចំនួន១៤៥០០កេស ជូនដល់អ្នកជំងឺនៅមន្ទីរពេទ្យធំៗចំនួន២បន្ថែមទៀត ក្នុងរាជធានីភ្នំពេញ ដែលសរុបទាំងអស់២ថ្ងៃចំនួន៣៣០០០កេស ដល់មន្ទីរពេទ្យចំនួន៥។

ការបរិច្ចាគទឹកបរិសុទ្ធ កម្ពុជា ដែលធ្វើឡើងនៅថ្ងៃទី១៤ កុម្ភៈនេះ គឺទៅដល់អ្នកជំងឺ នៅមន្ទីរពេទ្យពេទ្យកុមារជាតិ និងមន្ទីរពេទ្យមិត្តភាពខ្មែរ-សូវៀត។ នៅថ្ងៃទី១៣ ខែកុម្ភៈម្សិលមិញនេះ ការបរិច្ចាគទឹក គឺធ្វើឡើងនៅមន្ទីរពេទ្យព្រះកុសុមៈ មន្ទីរពេទ្យកុមារគន្ធបុប្ផាទី៤ និងមន្ទីរពេទ្យកាល់ម៉ែត។

លោកស្រី គង់ កុលស នាយិការផ្នែកទីផ្សារនៃក្រុមហ៊ុនខែ្មរប៊ែវើរីជីស បានឱ្យដឹងថា ការចូលរួមបរិច្ចាគទឹកបរិសុទ្ធ កម្ពុជា របស់ក្រុមហ៊ុន ខ្មែរ ប៊ែវើរីជីស គឺធ្វើឡើងក្នុងគោលបំណងជួយលើកកម្ពស់សុខុមាលភាពប្រជាពលរដ្ឋ ជួយសម្រាលបន្ទុកគ្រួសារអ្នកជំងឺ ជាពិសេសចែករំលែកនូវសេចក្ដីស្រឡាញ់ចំពោះអ្នកជំងឺ ដែលកំពុងសម្រាកព្យាបាលក្នុងមន្ទីរពេទ្យ។

សូមបញ្ជាក់ថា ៖ ទឹកបរិសុទ្ធកម្ពុជា ទឹកពិសាស្តង់ដារខ្ពស់ ត្រូវបានបន្សុទ្ធ ១០០% ដោយបច្ចេកវិទ្យាទំនើបបំផុតរបស់អាល្លឺម៉ង់ ដែលអាចជួយបំពេញជាតិទឹកក្នុងខ្លួន ធ្វើឲ្យស្បែកមានសំណើម និងអាចប្រើប្រាស់ជាទឹកពិសាប្រចាំថ្ងៃបាន៕ធ.ដ