ស្វាយរៀង ៖ ជនជាតិចិនម្នាក់ ត្រូវបានគេប្រទះឃើញដេកស្លាប់ នៅក្នុងបរិវេណអាគារក្រុមហ៊ុនប៉ារីសបូព៌ា ស្ថិតនៅភូមិបាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង ដោយមិនដឹងមូលហេតុ កាលពីវេលាម៉ោង ៣និង០៥នាទីទៀបភ្លឺថ្ងៃទី៣១ ខែសីហា ឆ្នាំ២០២១ ។

សមត្ថកិច្ចបានឲ្យដឹងថា ជនជាតិចិនដែលដេកស្លាប់នៅក្នុងអាគារក្រុមហ៊ុនបារីសបូព៌ានេះ មានឈ្មោះ ZHOU JINGWEI ភេទប្រុស អាយុ ១៩ឆ្នាំ មុខរបរបុគ្គលិកក្រុមហ៊ុន កាន់លិខិតឆ្លងដែនលេខ EG 4706382 មានទីលំនៅខេត្ត HUNAN ប្រទេសចិន ។ ពាក់ព័ន្ធនឹងករណីស្លាប់ជនជាតិចិននេះ សមត្ថកិច្ចខេត្តស្វាយរៀង មិនអាចបញ្ជាក់ប្រាប់ឲ្យដឹងអំពីមូលហេតុនោះទេដោយកំពុងតែស្រាវជ្រាវ ។

បច្ចុប្បន្នសពត្រូវបានតម្កល់ទុកនៅវត្តពោធិ៍ថ្មី ក្រុងបាវិត ដើម្បីរង់ចាំគ្រូពេទ្យធ្វើការពិនិត្យសំណាកក្រោយពីទទួលបានលទ្ធផលរួចទើបសមត្ថកិច្ចជំនាញធ្វើការពិនិត្យកោសល្យវិច័យបន្ត ៕