តើរដ្ឋមន្ត្រីការពារជាតិរុស្សីអាចជាអ្នកស្នងដំណែងពីលោកពូទីនដែរ ឬទេ?
បើទោះបីជាលោកវ្ល៉ាឌីមៀរ ពូទីនបានជាប់ឆ្នោតអាណត្តិប្រធានាធិបតីដំបូងតាំងពីឆ្នាំ២០០ក៏ដោយ ក៏បច្ចុប្បន្ននេះលោកកំពុងកាន់អំណាចក្នុងអាណត្តិទី «សូន្យ» បន្ទាប់ពីការអនុម័តច្បាប់ថ្មីមួយ កាលពីឆ្នាំមុនដែល «លុបបំបាត់» អាណត្តិបីមុន និងអាណត្តិបច្ចុប្បន្នរបស់លោក ហើយអនុញ្ញាតឱ្យលោកជៀសវាងការកំណត់ចំនួនអាណត្តិរបស់រដ្ឋធម្មនុញ្ញរុស្សី។
ខណៈពេលដែលការបោះឆ្នោតប្រធានាធិបតីឆ្នាំ ២០២៤ កាន់តែខិតជិត លោកពូទីនបាននិយាយថាលោកនៅតែកំពុងពិចារណាថាតើគួរឈរឈ្មោះសម្រាប់អាណត្តិទី «មួយ» របស់លោកដែរ ឬទេ ដែលជាក់ស្ដែងជាអាណត្តិទីប្រាំរបស់លោក។
កាលពីចូលកាន់អំណាចដំបូងលោកពូទីនបានបញ្ចាំងរូបភាពថាលោកគឺជាមេដឹកនាំវ័យក្មេងពោរពេញទៅដោយកម្លាំង ដោយចូលរួមក្នុងកីឡា និងសកម្មភាពនៅខាងក្រៅជាច្រើន ប៉ុន្តែនៅខែតុលាខាងមុខនេះលោកនឹងមានអាយុ ៦៩ឆ្នាំ ដែលធ្វើឱ្យមនុស្សជាច្រើនមានចម្ងល់ថាតើនរណាគេអាចស្នងដំណែងពីលោកពូទីនបាន ហើយនៅពេលណាដែរ។
អ្នកវិភាគគាំទ្រលោកពូទីនបានបដិសេធមិនបញ្ចេញមតិរបស់ពួកគេជុំវិញអត្តសញ្ញាណបេក្ខជនអាចស្នងដំណែងពីលោកពូទីន។
ប្រធានមជ្ឈមណ្ឌលព័ត៌មាននយោបាយ លោកអាឡិចស៊ី មុខិន ដែលជាអ្នកវិភាគមានមូលដ្ឋានប្រចាំការនៅក្រុងមូស្គូ បានប្រាប់សារព័ត៌មានអាល់ហ្សាហ្សីរ៉ាថា៖ «ជាការពិតណាស់ ខ្ញុំបានសរសេរអំពីពួកគេនៅក្នុងឯកសារសម្ងាត់ ហើយមនុស្សជាច្រើនក៏បានធ្វើដែរ ប៉ុន្តែការបញ្ចេញឈ្មោះពួកគេជាសាធារណ គឺជាការបង្ហាញការគាំទ្រចំពោះពួកគេ ដោយគ្មានអ្វីកើតឡើង»។
លោកនិយាយថាបញ្ជីឈ្មោះអ្នកដែលអាចស្នងដំណែង នឹងត្រូវប្រកាសជាសាធារណៈ បន្ទាប់ពីការចូលនិវត្ត ឬមរណភាពរបស់លោកពូទីន។ លោកនិយាយថា៖ «វាមិនមែនអំពីលោកពូទីនទេ វាគឺអំពីមនុស្សដែលចាប់អារម្មណ៍ក្នុងការរក្សាបញ្ជីឈ្មោះទាំងនេះរហូតដល់ម៉ោង X»។
សកម្មជនបក្សប្រឆាំងលោកស៊ែហ្គេ ប៊ីហ្សីគីន បាននិយាយថា៖ «លោកពូទីនគឺជាមនុស្សមានការសង្ស័យ និងការសម្ងាត់ច្រើន។ បើទោះបីជាគាត់បានជ្រើសរើសនរណាម្នាក់ជាអ្នកស្នងតំណែងក៏ដោយ ក៏គាត់នឹងមិនលាតត្រដាងឱ្យដឹងមុនទេ»។ លោកបន្តទៀតថាលោកពូទីននឹងមិនបោះបង់អំណាចដោយងាយៗទេ ដរាបណាលោកនៅមានជីវិត។
ក្រោមការគ្រប់គ្រងរបស់លោកពូទីនគ្មានអ្នកនយោបាយប្រឆាំងណាមួយមានសមត្ថភាព និងប្រជាប្រិយភាពគ្រប់គ្រាន់ដើម្បីប្រកួតប្រជែងជាមួយលោកបានទេ។ ស្របពេលជាមួយគ្នានេះ បេក្ខជនអាចស្នងតំណែងជាច្រើន ត្រូវបានដកចេញពីអំណាច ហើយឱ្យទៅកាន់តំណែងដែលមិនសូវពាក់ព័ន្ធនឹងនយោបាយរុស្សី។
នៅពេលដែលលោកពូទីន ឈានដល់ដែនកំណត់អាណត្តិទីពីរកាលពីឆ្នាំ ២០០៨ លោកបានចាកចេញពីតំណែង ហើយបានជ្រើសរើសអ្នកក្រោមបង្កាប់ជាយូរឆ្នាំគឺលោកឌីមីទ្រី មេដវេដេវ ជាអ្នកស្នងដំណែងបណ្ដោះអាសន្ន ខណៈពេលលោកពូទីនមកកាន់តំណែងនាយករដ្ឋមន្ត្រីជាបណ្ដោះអាសន្នវិញ។
លោកពូទីនបានជាប់ឆ្នោតជាប្រធានាធិបតីម្ដងទៀតនៅឆ្នាំ ២០១២ ហើយបានតែងតាំងលោកមេដវេដេវជានាយករដ្ឋមន្ត្រី។ ប៉ុន្តែកាលពីឆ្នាំមុនលោកពូទីន បានរំសាយរដ្ឋាភិបាលរបស់លោកមេដវេដេវ ហើយតែងតាំងលោកជាអនុប្រធានក្រុមប្រឹក្សាសន្តិសុខ ដែលជាតំណែងមិនសូវមានអំណាចក្នុងនយោបាយរុស្សី។
ឥឡូវនេះ អ្នកវិភាគមួយចំនួនបានយល់ឃើញថាបេក្ខជនឈានមុខគេសម្រាប់ការស្នងតំណែងពីលោកពូទីន គឺរដ្ឋមន្ត្រីក្រសួងការពារជាតិរុស្សីលោកនាយឧត្ដមសេនីយ៍ស៊ែហ្គេ សយហ្គូ ដែលជារដ្ឋមន្ត្រីបម្រើការបានយូរជាងគេរបស់រុស្សី និងជាអ្នកនយោបាយមានប្រជាប្រិយភាពខ្ពស់ជាងគេបន្ទាប់ពីលោកពូទីន។
លោកសយហ្គូ មានលក្ខណៈខុសប្លែកជាច្រើនពីអ្នកនយោបាយរុស្សីផ្សេងទៀត។
បើទោះបីឈ្មោះរបស់លោកគឺជាឈ្មោះរបស់រុស្សីចំ លោកសយហ្គូគឺមកពីក្រុមជនជាតិភាគតិចថូហ្វា (Tuva) ដែលនិយាយភាសាអម្បូរតួកគី កាន់សាសនាព្រះពុទ្ធ ហើយមានដើមកំណើតនៅតំបន់ព្រំដែនជាប់ជាមួយភាគពាយ័ព្យនៃប្រទេសចិន។
លោកបានចាប់ផ្ដើមលេចធ្លូក្នុងផ្ទៃនយោបាយរុស្សីកាលពីទសវត្ស នៅពេលដែលត្រូវបានតែងតាំងជារដ្ឋមន្ត្រីក្រសួងស្ថានការណ៍គ្រាអាសន្ន ដែលទទួលបន្ទុកគ្រប់គ្រងគ្រោះមហន្តរាយ។ លោកបានធ្វើឱ្យក្រសួងនេះដំណើរការដោយប្រសិទ្ធភាព ដោយធ្វើកំណែទម្រង់រចនាសម្ព័ន្ធឱ្យដូចកងយោធា។ ការបង្ហាញមុខរបស់លោកក្នុងការជួយសង្គ្រោះមនុស្សនៅក្នុងគ្រោះមហន្ត ត្រាយនានា បានធ្វើឱ្យប្រជាប្រិយភាពរបស់កើនយ៉ាងខ្លាំង។
លោកត្រូវបានតែងតាំងជារដ្ឋមន្ត្រីក្រសួងការពារជាតិកាលពីឆ្នាំ ២០១២ ហើយលោកបានដឹកនាំសមិទ្ធផលធំៗរបស់រុស្សីដូចជាការកាត់យកឧបទ្វីបគ្រីមៀរពីអ៊ុយក្រែន និងការជួយអន្តរាគមន៍ក្នុងសង្គ្រាមស៊ីវិលប្រទេសស៊ីរី។
មុនការបោះឆ្នោតសភារុស្សីនៅពាក់កណ្ដាលខែនេះ លោកពូទីនបានតែងតាំងលោកសយហ្គូជាតំណាងមុខមាត់របស់គណបក្សលោក។ ក្នុងការចុះផ្សាយតាមទូរទស្សន៍រុស្សី គេតែងតែបង្ហាញភាពជិតស្និតរវាងបុរសទាំងពីររូបនេះ ដែលជាសញ្ញាមួយបង្ហាញថាលោកពូទីនអាចជ្រើសរើសលោកសយហ្គូជាអ្នកស្នងដំណែងពីលោក៕
