កាប៊ុល៖ រដ្ឋាភិបាលតាលីបង់ នៅថ្ងៃអាទិត្យសប្តាហ៍មុន បានអំពាវនាវដល់ក្រុមហ៊ុនអាកាសចរណ៍អន្តរជាតិបើកដំណើរជើងហោះហើតឡើងវិញ ដោយសន្យាថានឹងសហការពេញលេញជាមួយក្រុមហ៊ុន ស្របពេលបញ្ហាទាំងអស់នៅអាកាសយានដ្ឋានកាប៊ុលត្រូវបានដោះស្រាយ។

សេចក្តីថ្លែងការណ៍របស់ក្រសួងការបរទេសតាលីបង់ខាងលើនេះ បានធ្វើឡើង ខណៈដែលរដ្ឋបាលថ្មីនេះ បានបង្កើនកិច្ចខិតខំប្រឹងប្រែងដើម្បីបើកប្រទេស និងស្វែងរកការទទួលស្គាល់ពីអន្តរជាតិ បន្ទាប់ពីការដួលរលំនៃរដ្ឋាភិបាលដែលគាំទ្រដោយលោកខាងលិចកាលពីខែមុន។

រហូតមកទល់ពេលនេះ សេវាកម្មពាណិជ្ជកម្មធម្មតាមិនទាន់ដំណើរការឡើងវិញទេ ចាប់តាំងពីវាត្រូវបានបិទ បន្ទាប់ពីមានភាពវឹកវរក្នុងការជម្លៀសជនបរទេសរាប់ម៉ឺននាក់ ក្នុងនោះរួមមានទាំងជនជាតិអាហ្វហ្គានីដែលងាយរងគ្រោះ បន្ទាប់ពីក្រុមតាលីបង់ការចូលកាន់កាប់ប្រទេសអាហ្វហ្គានីស្ថាន៕ ប្រភព៖ Reuters