ប្រាក់ kyat របស់ភូមាចុះថោកជាង៦០% តាំងពីរដ្ឋប្រហារមក
លុយមីយ៉ាន់ម៉ាបានធ្លាក់ចុះតម្លៃជាង៦០ភាគរយ ចាប់តាំងពីដើមខែកញ្ញាមក ធ្វើឲ្យតម្លៃអាហារ ប្រេងសាំង ឡើងថ្លៃ ក្នុងពេលសេដ្ឋកិច្ចបានធ្លាក់ចុះ ចាប់តាំងពីកើតមានរដ្ឋប្រហារយោធា ៨ខែមកនេះ នេះបើតាមការចេញផ្សាយរបស់ Thai PBS។
ហាងលក់មាសនិងកន្លែងប្តូរប្រាក់ជាច្រើនបានបិទទ្វារ កាលពីថ្ងៃពុធ ដោយសារតែបញ្ហាចលាចល ខណៈដែលការធ្លាក់ចុះរបស់ប្រាក់ kyat (ខ្យាត) គេលើកមកនិយាយច្រើននៅលើបណ្តាញសង្គម ខណៈដែលមានពាក្យចចាមអារ៉ាមថា វិបត្តិមួយទៀតបានវាយប្រហារប្រទេសដែលហែកហួរដោយជម្លោះនេះ។
គិតត្រឹមថ្ងៃអង្គារ សប្តាហ៍នេះ អត្រាប្តូរប្រាក់ ១ដុល្លារអាមេរិក ស្មើនឹង ២៧០០ kyat ខណៈកាលពីដើមខែកញ្ញា ១ ដុល្លារ ស្មើនឹង ១៦៩៥ kyat រីឯកាលពីកុម្ភៈ ១ដុល្លារ ស្មើនឹង ១៣៩៥ kyat ហើយថ្ងៃទី១ កុម្ភៈ គឺជាថ្ងៃដែលពួកយោធាបានចូលទៅផ្តួល ចូលកាន់កាប់ប្រទេស៕
