ក្រុមសុខាភិបាលអន្តរជាតិស្នើអោយក្រុមហ៊ុន Merck ចែកចាយថ្នាំគ្រាប់ព្យាបាលជំងឺកូវីដ-១៩ដល់ប្រទេសក្រីក្រី (Video Inside)
បរទេស៖ ក្រុមសុខាភិបាលអន្តរជាតិបានបញ្ជាក់ថា ផែនការចែកចាយថ្នាំលេបព្យាបាលជំងឺកូវីដ១៩របស់ក្រុមហ៊ុន មើក អេន ខូ (Merck & Co) មានវិសមភាពដូចទៅនឹងការផ្គត់ផ្គង់វ៉ាក់សាំងដែរ សម្រាប់ប្រទេសមានប្រាក់ចំណូលទាប។
ឧទាហរណ៍មានប្រមាណ៥%នៃប្រជាជនអាហ្វ្រិកបានចាក់វ៉ាក់សាំងបង្ការជំងឺកូវីដ១៩ ដែលត្រូវបង្កើតតម្រូវការបន្ទាន់សម្រាប់ការព្យាបាលដែលអាចជួយឲ្យប្រជាជនមិនឲ្យចូលមន្ទីរពេទ្យ។ ប្រការនេះបើធៀបនឹងប្រទេសមានចំណូលខ្ពស់បំផុតមានអត្រាចាក់វ៉ាក់សាំងជាង៧០%។ កាលពីថ្ងៃទី១១ ខែតុលាកន្លងទៅ ក្រុមហ៊ុនផលិតឱសថ មើក (Merck) បានដាក់ស្នើសុំការប្រើប្រាស់ថ្នាំគ្រាប់ ម៉ុលនូភីរ៉ាវៀ(Molnupiravir) របស់ខ្លួនទៅអាជ្ញាធរអាមេរិក ដែលបានក្លាយជាថ្នាំគ្រាប់លេបព្យាបាលជំងឺកូវីដ១៩ដំបូងគេ។ នៅក្នុងការសាកល្បងបានបង្ហាញថា ថ្នាំគ្រាប់នេះមានប្រសិទ្ធភាពកាត់បន្ថយមិនឲ្យចូលមន្ទីរពេទ្យ និងស្លាប់បាន៥០ភាគរយ។
ថ្នាំគ្រាប់ដែលបានផលិតសហការជាមួយក្រុមហ៊ុន រីដហ្គេតប៊េគ បាយអូធើរ៉ាភើតធីក (Ridgeback Biotherapeutics) អាចនឹងទទួលបានការអនុញ្ញាតឲ្យប្រើប្រាស់បន្ទាន់ប្រហែលជាខែធ្នូ។ ឆ្នាំនេះ Merck គ្រោងផលិតថ្នាំគ្រាប់ ម៉ុលនូភីរ៉ាវៀ ចំនួន១០លានសិតសម្រាប់ព្យាបាលអ្នកជំងឺកូវីដ១៩ ហើយគ្រោងផលិតចំនួន២០លានសិតទៀតនៅឆ្នាំ២០២២ខាងមុខនេះ៕ ប្រភព៖ CNA
