យោធាមីយ៉ាន់ម៉ា៖ របាយការណ៍សិទ្ធិមនុស្សរបស់អង្គការសហប្រជាជាតិស្តីពីប្រទេសខ្លួនជាការញុះញង់អោយមានអំពើហិង្សា
យ៉ាងហ្គូន៖ រដ្ឋាភិបាលយោធាមីយ៉ាន់ម៉ាបានចាត់ទុករបាយការណ៍សិទ្ធិមនុស្សចុងក្រោយបង្អស់របស់អង្គការសហប្រជាជាតិស្តីពីប្រទេសដែលមានជម្លោះនេះថា ជាការញុះញង់អោយមានអំពើហិង្សា ហើយបានចោទប្រកាន់ស្ថាប័ននេះថាបានជ្រៀតជ្រែកក្នុងកិច្ចការផ្ទៃក្នុងរបស់ខ្លួន។
អង្គការសហប្រជាជាតិកាលពីថ្ងៃសុក្រសប្តាហ៍មុនបញ្ជាក់ថា ខ្លួនមានការបារម្ភអំពីមហន្តរាយសិទ្ធិមនុស្សកាន់តែខ្លាំង ចំពេលមានរបាយការណ៍ថា ទាហាន និងអាវុធធុនធ្ងន់រាប់ម៉ឺនកំពុងត្រូវបានចល័តទីទៅកាន់តំបន់ ដែលមានការប្រឆាំងនៅភាគខាងជើង និងភាគពាយព្យ។ ទន្ទឹមនេះ អ្នករាយការណ៍ពិសេសប្រចាំមីយ៉ាន់ម៉ា លោក ថម អេនឌ្រូ បានព្រមានដល់មហាសន្និបាតអង្គការសហប្រជាជាតិថា យុទ្ធសាស្ត្រនេះគឺធ្វើឱ្យគេនឹកឃើញដល់រឿងអកុសលដែលបានដាក់ពង្រាយ មុនពេលការបង្ក្រាបបង្ហូរឈាមលើជនជាតិភាគតិចរ៉ូហ៊ីងយ៉ាក្នុងឆ្នាំ ២០១៦-២០១៧ ។
ជាការឆ្លើយតបនោះ នៅថ្ងៃអាទិត្យម្សិលមិញ របបយោធាមីយ៉ាន់ម៉ាបានរិះគន់របាយការណ៍ខាងលើនេះ ហើយបានចោទប្រកាន់អង្គការសហប្រជាជាតិថា បានប្រើប្រាស់សិទ្ធិមនុស្សជាឧបករណ៍នយោបាយ ដើម្បីជ្រៀតជ្រែកកិច្ចការផ្ទៃក្នុងរបស់មីយ៉ាន់ម៉ា។ បើតាមក្រសួងការបរទេសរបបយោធាមីយ៉ាន់ម៉ា របាយការណ៍នេះ នឹងនាំអោយមានការបែកបាក់បន្ថែមទៀតក្នុងប្រទេសជាតិនេះ និងជាការញុះញង់អោយមានអំពើហិង្សាផ្ទៃក្នុង៕ ប្រភព៖ CNA
