ចិនមានបំណងកាត់បន្ថយការប្រើប្រាស់ឥន្ធនៈស៊ីលឱ្យនៅក្រោម ២០ភាគរយត្រឹមឆ្នាំ ២០៦០
ប៉េកាំង៖ ទីភ្នាក់ងារព័ត៌មានចិនស៊ីនហួរកាលពីថ្ងៃអាទិត្យរាយការណ៍ថា ប្រទេសចិនកំពុងកំណត់គោលដៅថាមពលស្អាតក្រោមផែនការផ្លូវការមួយ មានមហិច្ឆតាក្នុងការកាត់បន្ថយការប្រើប្រាស់ឥន្ធនៈហ្វូស៊ីលឱ្យនៅក្រោម ២០ ភាគរយនៅត្រឹមឆ្នាំ ២០៦០។
ផែនការថ្មីធ្វើឡើងក្រោយលោកប្រធានាធិបតី ស៊ី ជីនពីង (Xi Jinping) ប្ដេជ្ញាកាត់បន្ថយការបញ្ចេញកាបូននៅឆ្នាំ ២០៣០ និងសម្រេចបាននូវអព្យាក្រឹតភាពកាបូន ៣០ឆ្នាំបន្ទាប់ ខណៈពេលប្រទេសនេះត្រូវបានគេរិះគន់ពីរឿងការជំរុញឲ្យមានការបើករោងចក្រថាមពលធ្យូងថ្មថ្មីរាប់សិបកន្លែង។
តាមការរាយការណ៍ ចិនដាក់ចេញនូវគោលដៅជាច្រើននៅក្នុងផ្លូវរបស់ខ្លួនឆ្ពោះទៅរកអព្យាក្រឹតភាពកាបូន ហើយក្នុងចំនោមនេះ មានសមាមាត្រនៃការប្រើប្រាស់ឥន្ធនៈមិនមែនហ្វូស៊ីលឈានដល់ប្រហែល ២៥ ភាគរយនៃការប្រើប្រាស់ថាមពលសរុបនៅឆ្នាំ ២០៣០ ។
យោងតាមការផ្សាយរបស់ស៊ីនហួរដដែល នៅឆ្នាំនោះ ការបំភាយកាបូនឌីអុកស៊ីតក្នុងមួយឯកតានៃផលិតផលក្នុងស្រុកសរុបនឹងធ្លាក់ចុះជាង ៦៥ ភាគរយពីកម្រិតឆ្នាំ ២០០៥ ខណៈពេលដែលសមត្ថភាពដំឡើងសរុបនៃថាមពលខ្យល់ និងថាមពលពន្លឺព្រះអាទិត្យត្រូវបានកំណត់គោលដៅឱ្យឈានដល់ជាង ១,២ ពាន់លានគីឡូវ៉ាត់។ គោលការណ៍ណែនាំនេះក៏រំឮកឡើងវិញពីគោលដៅមុនសម្រាប់ការបញ្ចេញកាបូនក្នុងមួយឯកតានៃផលិតផលក្នុងស្រុកសរុបឱ្យធ្លាក់ចុះ ១៨ ភាគរយនៅឆ្នាំ ២០២៥ ពីស្តង់ដារឆ្នាំ ២០២០ ។
ប្រទេសចិនប្រឈមមុខនឹងផ្តាច់ខ្លួនចេញពីការប្រើប្រាស់ធ្យូងថ្មដែលជួយសេដ្ឋកិច្ចដែលពឹងផ្អែកលើថាមពលជិត ៦០ភាគរយ។ អ្នករៀបចំផែនការសេដ្ឋកិច្ចភ័យខ្លាចថា ការកាត់បន្ថយបំផ្លាញធ្យូងថ្មលឿនពេកអាចប៉ះពាល់ដល់កំណើនសេដ្ឋកិច្ច។
ខណៈដែលចិននិយាយនៅក្នុងសេចក្តីថ្លែងការណ៍ថាប្រធានាធិបតីស៊ីមានបំណងគ្រប់គ្រងយ៉ាងតឹងរ៉ឹងនូវកំណើនរោងចក្រថាមពលធ្យូងថ្ម ប្រទេសនេះក៏បង្ហាញពីការបន្តកើនឡើងក្នុងរយៈពេលពីរបីឆ្នាំខាងមុខដោយនិយាយថា ការប្រើប្រាស់ធ្យូងថ្មនឹងចាប់ផ្តើមកាត់បន្ថយបន្តិចម្តងៗចាប់ពីឆ្នាំ ២០២៦ ។
