លោក ស៊ី ជិនពីង ជំរុញអោយធ្វើសកម្មភាពកាន់តែខ្លាំងបន្ថែមទៀត ដើម្បីប្រយុទ្ធប្រឆាំងនឹងបញ្ហាប្រែប្រួលអាកាសធាតុ
ប៉េកាំង៖ ប្រធានាធិបតីចិនលោក ស៊ី ជិនពីង បានធ្វើការអំពាវនាវយ៉ាងទទូចអោយគ្រប់ភាគីពាក់ព័ន្ធទាំងអស់ ចាត់វិធានការកាន់តែខ្លាំងឡើងបន្ថែមទៀត ដើម្បីរួមគ្នាដោះស្រាយបញ្ហាប្រែប្រួលអាកាសធាតុ។
លោក ស៊ី បានកត់សម្គាល់បែបនេះនៅក្នុងសេចក្តីថ្លែងការណ៍ជាលាយលក្ខណ៍អក្សរសម្រាប់កិច្ចប្រជុំកំពូលរបស់មេដឹកនាំពិភពលោក នៅក្នុងសម័យប្រជុំលើកទី ២៦ នៃសន្និសិទស្តីពីអាកាសធាតុសកល COP26 របស់អង្គការសហប្រជាជាតិ ក្នុងទីក្រុងក្លាសហ្គូវ ប្រទេសស្កុតលែន ដែលកំពុងប្រព្រឹត្តិទៅចាប់ពីថ្ងៃចន្ទ ដល់អង្គារសប្តាហ៍នេះ។ នៅក្នុងសេចក្តីថ្លែងការណ៍នេះ លោក ស៊ី បាននិយាយដូច្នេះថា ខ្ញុំសង្ឃឹមថា គ្រប់ភាគីពាក់ព័ន្ធទាំងអស់នឹងចាត់វិធានការកាន់តែខ្លាំងក្លាឡើង ដើម្បីរួមគ្នាដោះស្រាយបញ្ហាប្រឈមផ្នែកអាកាសធាតុ ក៏ដូចជាការពារភពផែនដី ដែលជាផ្ទះរួមគ្នាសម្រាប់យើងទាំងអស់គ្នា។ បន្ថែមលើនេះ លោក ស៊ី បានលើកសំណើ ៣ចំណុច ដើម្បីដោះស្រាយបញ្ហាប្រឈមអាកាសធាតុ ក្នុងនោះរួមមាន៖ ការរក្សាការមូលមតិគ្នាអំពីពហុភាគីនិយម ការផ្តោតលើសកម្មភាពជាក់ស្តែង និងការពន្លឿនការផ្លាស់ប្តូរទៅរកថាមពលបៃតង។
បើតាមប្រធានាធិបតីចិនរូបនេះ អនុសញ្ញាក្របខ័ណ្ឌអង្គការសហប្រជាជាតិស្តីពីការប្រែប្រួលអាកាសធាតុ និងកិច្ចព្រមព្រៀងទីក្រុងប៉ារីស បានផ្តល់នូវមូលដ្ឋានច្បាប់ជាគ្រឹះ សម្រាប់កិច្ចសហប្រតិបត្តិការអន្តរជាតិស្តីពីអាកាសធាតុ។ ភាគីទាំងអស់ត្រូវកសាងលើការយល់ស្របដែលមានស្រាប់ បង្កើនការជឿទុកចិត្តគ្នាទៅវិញទៅមក បង្កើនកិច្ចសហប្រតិបត្តិការ និងធ្វើការជាមួយគ្នា ដើម្បីផ្តល់ជោគជ័យដល់កិច្ចប្រជុំ COP26 នៅទីក្រុងក្លាសហ្គូវ៕ ប្រភព៖ ស៊ីនហួរ
