សហរដ្ឋអាមេរិកបើកព្រំដែនឡើងវិញក្រោយបិទអស់រយៈពេល២០ខែ
កាលពីថ្ងៃចន្ទ ទី៨ វិច្ឆិកាសហរដ្ឋអាមេរិកបានបើកព្រំដែនផ្លូវគោក និងផ្លូវអាកាសដល់ជនបរទេសដែលបានចាក់វ៉ាក់សាំងកូវីដ-១៩ ដែលជាការបញ្ចប់ការដាក់កំហិតរយៈពេល២០ ខែលើការធ្វើដំណើរជុំវិញពិភពលោក ដែលបានបំបែកបំបាក់ក្រុមគ្រួសារ រំខានដល់វិស័យទេសចរណ៍ និងបង្កភាពតានតឹងក្នុងទំនាក់ទំនងការទូត។
ក្នុងកិច្ចខិតខំប្រឹងប្រែងដើម្បីពន្យឺតការរីករាលដាលនៃវីរុសកូរ៉ូណា ព្រំដែនសហរដ្ឋអាមេរិកត្រូវបានបិទបន្ទាប់ពីខែមីនាឆ្នាំ ២០២០ សម្រាប់អ្នកធ្វើដំណើរមកពីផ្នែកជាច្រើននៃពិភពលោក រួមទាំងសហភាពអឺរ៉ុប ចក្រភពអង់គ្លេស ចិន ឥណ្ឌា និងប្រេស៊ីល។ អ្នកធ្វើដំណើរតាមព្រំដែនគោកមកពីម៉ិកស៊ិក និងកាណាដាក៏ត្រូវបានហាមឃាត់ផងដែរ។
ការហាមឃាត់ការធ្វើដំណើរ ដែលដាក់ដោយអតីតប្រធានាធិបតីលោកដូណាល់ ត្រាំ ហើយបន្តដោយប្រធានាធិបតីបច្ចុប្បន្នលោកចូ បៃដិន ត្រូវបានគេរិះគន់យ៉ាងទូលំទូលាយ និងក្លាយជានិមិត្តរូបនៃភាពចលាចលបង្កឡើងដោយជំងឺរាតត្បាត។ ការហាមឃាត់នេះគឺមិនពេញនិយមជាពិសេសនៅអឺរ៉ុប កាណាដា និងម៉ិកស៊ិក។
ខណៈពេលដែលពលរដ្ឋអាមេរិកអាចធ្វើដំណើរទៅកាន់អឺរ៉ុបត្រឹមពាក់កណ្ដាលឆ្នាំនេះ ជនបរទេសកាន់ទិដ្ឋាការអាមេរិកនៅមិនមានការធានាថាអាចចូលក្នុងទឹកដីអាមេរិកបាន ឬទេ។
នៅតាមបណ្ដោយព្រំដែនជាមួយម៉ិកស៊ិក ទីក្រុងជាច្រើនក្នុងរដ្ឋតិចសាស់ និងកាលីហ្វ័រញ៉ារបស់សហរដ្ឋអាមេរិកបានប្រឈមមុខការលំបាកផ្នែកសេដ្ឋកិច្ច ខណៈវិធានការប្រឆាំងកូវីដ-១៩ បានប៉ះពាល់យ៉ាងខ្លាំងដល់ពាណិជ្ជកម្មឆ្លងព្រំដែន។
យ៉ាងណាមិញការលុបចោលការហាមឃាត់ការធ្វើដំណើរនឹងចូលជាធរមានសម្រាប់ប្រទេសចំនួន ៣០។ ប៉ុន្តែការធ្វើដំណើរពីប្រទេសទាំងនេះចូលដែនដីអាមេរិកនឹងមិនធ្វើឡើងដោយគ្មានការគ្រប់គ្រងទេ។ អាជ្ញាធរអាមេរិកគ្រោងនឹងតាមដានយ៉ាងដិតដល់នូវស្ថានភាពចាក់វ៉ាក់សាំងរបស់អ្នកធ្វើដំណើរ ហើយនៅតែតម្រូវឱ្យពួកគេធ្វើតេស្តអវិជ្ជមានជំងឺកូវីដ-១៩៕
