ថៃ៖ កូវីដមិនទាន់ធូរទេ កើនដល់ជិត២លាននាក់ហើយ
គិតត្រឹមព្រឹកថ្ងៃទី១០ វិច្ឆិកា ២០២១នេះ ប្រទេសថៃមានអ្នកកើតជំងឺកូវីដ១៩ កើនដល់ជិត២លាននាក់ហើយ ខណៈអ្នកស្លាប់ព្រោះជំងឺនេះ បានកើនដល់ជិត២ម៉ឺននាក់ហើយដែរ។ ចាប់តាំងពីដើមឆ្នាំ២០២០មក ចំនួនអ្នកកើតជំងឺកូវីដ១៩សរុប បានកើនដល់ ចំនួន ១,៩៨៩,៤៧៣នាក់ ខណៈមនុស្សស្លាប់ព្រោះកូវីដ១៩ កើនដល់ ១៩៨៦២នាក់ហើយ។
យ៉ាងណាក៏ដោយ ក្នុងចំណោមអ្នកជំងឺជិត២លាននាក់ ក៏មានអ្នកជំងឺ ១,៨៧៣,១៨៤នាក់ត្រូវបានព្យាបាលឲ្យជាសះស្បើយ។ ចំនួនវិជ្ជមាននិងស្លាប់ប្រចាំថ្ងៃនៅប្រទេសថៃមិនទាន់ថមថយច្រើនទេ បើទោះបីជាខ្លួនទើបបើកប្រទេសស្វាគមន៍អ្នកដំណើរអន្តរជាតិវិញ កាលពីដើមខែវិច្ឆិកាក៏ដោយ។
ជាក់ស្តែង ក្រសួងសុខាភិបាលថៃបានប្រកាស នាព្រឹកថ្ងៃទី១០ វិច្ឆិកានេះថា មានវិជ្ជមាន ៦៩៧៨នាក់ និងស្លាប់ ៦២នាក់ បន្ថែមទៀត ក្នុងពេល២៤ម៉ោងចុងក្រោយមកនេះ៕
