ប្រមុខយូអិនរិះគន់ការរឹតបន្តឹងលើការធ្វើដំណើរមកពីទ្វីបអាហ្វ្រិក ដោយសារតែការព្រួយបារម្ភពីវីរុសបំប្លែងថ្មី អូមីក្រុង
បរទេស៖ អគ្គលេខាធិការអង្គការសហប្រជាជាតិលោក អាន់តូនី ហ្គូដទែរេស បានរិះគន់ប្រទេសនានាចំពោះការរឹតបន្តឹងលើអ្នកដំណើរមកពីប្រទេសជាក់លាក់ ដែលជាវិធានការប្រឆាំងនឹងវីរុសបំប្លែងថ្មី។
លោក ហ្គូទែរេស បានថ្លែងនៅក្នុងសន្និសីទសារព័ត៌មាននៅឯទីស្នាក់ការអង្គការសហប្រជាជាតិក្នុងទីក្រុងញូយ៉ក ថា ការរឹតបន្តឹងនេះមិនយុត្តិធម៌ទេ ពីព្រោះ ករណីឆ្លងដែលមានជាប់ពាក់ព័ន្ធនឹងវីរុសបំប្លែងថ្មី អូមីក្រុង ត្រូវបានរកឃើញនៅជុំវិញពិភពលោក។ បច្ចុប្បន្នបាននិងកំពុងកើនឡើងនូវចំនួនប្រទេសអនុវត្តវិធានការរឹតបន្តឹងការគ្រប់គ្រងព្រំដែន សម្រាប់អ្នកធ្វើដំណើរមកពីប្រទេសអាហ្វ្រិកខាងត្បូង។ ចលនាគឺជាការឆ្លើយតបទៅនឹងការរកឃើញមេរោគបំប្លែងថ្មី អូមីក្រុង ដែលត្រូវបានរកឃើញដំបូងនៅប្រទេសអាហ្វ្រិកខាងត្បូង ក្នុងខែវិច្ឆិកា។
ប្រមុខអង្គការសហប្រជាជាតិបានជំរុញសហគមន៍អន្តរជាតិឱ្យពិចារណាលើវិធានការមានប្រសិទ្ធភាពបន្ថែមទៀត ដូចជាតម្រូវឱ្យធ្វើតេស្ត PCR ម្តងហើយម្តងទៀតសម្រាប់អ្នកធ្វើដំណើរ។ លោក ហ្គូទែរេស បានព្រមានថា តំបន់ដែលមានអត្រាចាក់វ៉ាក់សាំងបង្ការជំងឺកូវីដ១៩ទាប អាចនឹងក្លាយជាទីកន្លែងបង្កាត់ពូជសម្រាប់មេរោគបំប្លែងថ្មី ដោយលោកក៏បានអំពាវនាវឲ្យមានកិច្ចសហប្រតិបត្តិការក្នុងការខិតខំជំរុញការផ្តល់ថ្នាំបង្ការដល់ប្រទេសកំពុងអភិវឌ្ឍន៍ផងដែរ៕ ប្រភព៖ NHK
