រតនគិរី ៖ ករណីគ្រោះថ្នាក់ចរាចរណ៍មួយបានកើតឡើងរវាងរថយន្តនិងម៉ូតូ បណ្តាលឲ្យមានមនុស្សរងរបួស ក្នុងទិសដៅបញ្ច្រាសគ្នា ។ ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង៧និង៥៣នាទីព្រឹក ថ្ងៃទី១៤ ខែឆ្នូ ឆ្នាំ២០២១ តាមផ្លូវលំក្រាលក្រួសក្រហមមួយខ្សែរ ត្រង់ចំណុចមុខផ្ទះឈ្មោះ តាក់ ច្រវឿន ស្ថិតនៅក្នុងភូមិកាឡៃ២ ឃុំកាឡៃ ស្រុកអូរជុំ ។

យោងតាមរបាយការណ៍ពីនគរបាលស្រុកអូរជុំបានបញ្ជាក់ថា បន្ទាប់ពីទទួលបានព័ត៌មានភ្លាម កម្លាំងជំនាញនៃអធិការនិងកម្លាំងនគរបាលប៉ុស្តិ៍រដ្ឋបាល បានចុះទៅដល់កន្លែងកើតហេតុ ។ របាយការណ៍បានបញ្ជាក់ទៀតថា ម៉ូតូ១គ្រឿងម៉ាក ស្មាក់ រេ វ៉ូ ពាក់ស្លាកលេខ រដ្ឋ19 1- 2392 អ្នកបើកបរឈ្មោះ សៀង ប៊ួខាំ ភេទប្រុស អាយុ៥១ឆ្នាំ ជនជាតិខ្មែរ មុខរបរមន្ត្រីរាជការស៊ីវិល មានទីលំនៅបច្ចុប្បន្នភូមិហ្វាំង ឃុំប៉ង់ ស្រុកវើនសៃ ខេត្តរតនគិរី រងរបួសធ្ងន់ ។

របាយការណ៍បានបញ្ជាក់ទៀតថា រថយន្ត១គ្រឿងម៉ាក ford ranger ពណ៌ស ពាក់ស្លាកលេខ ONG1 2- 0707 បើកបរដោយឈ្មោះ ហស ផាន់ ភេទប្រុស អាយុ៥៣ឆ្នាំ ជនជាតិខ្មែរ មុខរបរមន្ត្រីអង្គការស៊ីម៉ាក់ មានទីលំនៅបច្ចុប្បន្នភូមិឡូន សង្កាត់យក្ខឡោម ក្រុងបានលុង ខេត្តរតនគិរី ខណះនោះដែរ រថយន្តបានវ៉ាជែងនិងរថយន្តផ្សេងទៀត មិនបានប្រុងប្រយ័ត្នទើបបណ្តាលឲ្យជ្រុលចង្កូតទៅបុកនិងម៉ូតូកំពុងតែធ្វើចរាចរណ៍ក្នុងទិសដៅបញ្ច្រាសគ្នាបណ្តាលអោយខ្ទាតម៉ូតូធ្លាក់ជេីងទេផ្លូវម្ចាស់រងរបួសធ្ងន់ ។

ក្រោយកើតហេតុអ្នករងគ្រោះត្រូវបានក្រុមគ្រួសារដឹកយកទៅព្យាបាលនៅមន្ទីរពេទ្យបង្អែកខេត្តរតនគិរី ភ្លាមៗផងដែរ ។ ដោយឡែកវត្ថុតាងទាំងពីរគ្រឿងត្រូវបានកម្លាំងនគរបាលស្រុកអូរជុំ យកមករក្សាទុកនៅអធិការដើម្បីធ្វើការសម្របសម្រួលដោះស្រាយតាមច្បាប់ចរាចរផ្លូវកោគ ៕ ដោយ គតិ យុត្ត