វៀតណាមមិនឲ្យជួបជុំមនុស្សច្រើន ក្នុងថ្ងៃឆ្លងឆ្នាំ និងបុណ្យចូលឆ្នាំថ្មី
គ្មានសកម្មភាពជួបជុំមនុស្សច្រើន នៅអំឡុងពិធីបុណ្យចូលឆ្នាំសកល នាពេលខាងមុខទេ នេះបើតាមនាយករដ្ឋមន្ត្រីវៀតណាម Pham Minh Chinh បញ្ជាក់ ចេញផ្សាយដោយទីភ្នាក់ងារព័ត៌មាន VNexpress នាថ្ងៃទី២៣ ធ្នូនេះ។ ប្រភពថា រដ្ឋាភិបាលបានសម្រេចចិត្តបែបនេះ កាលពីថ្ងៃម្សិលមិញ ដោយនាយករដ្ឋមន្ត្រីវៀតណាម នៅអំឡុងកិច្ចប្រជុំស្តីពីស្ថានភាពកូវីដ។
ស្មារតីអង្គប្រជុំថា មូលហេតុចំបងគឺបញ្ហាឆ្លងរាលដាលនៃជំងឺកូវីដ ខណៈដែលចំនួនឆ្លងថ្មីៗ និងស្លាប់មនុស្សព្រោះកូវីដ នៅតែខ្លាំង។ មិនត្រឹមតែបុណ្យឆ្លងឆ្នាំទេ សូម្បីតែបុណ្យចូលឆ្នាំថ្មី នាចុងខែមករា និង ដើមខែកុម្ភៈ ឆ្នាំ២០២២ ក៏ពុំអនុញ្ញាតឲ្យជួបជុំគ្នាច្រើនដែរ។
បើតាមប្រភពព័ត៌មាន វៀតណាមបានអនុញ្ញាតឲ្យឈប់សម្រាកការងារ ៣ថ្ងៃ ចាប់ពីថ្ងៃទី១ ដល់ ៣ មករា ២០២២ សម្រាប់ពិធីបុណ្យឆ្លងឆ្នាំ ហើយបុណ្យចូលឆ្នាំថ្មីវិញ គឺឈប់សម្រាកពីថ្ងៃទី២៨ មករា ដល់ ៦ កុម្ភៈ ២០២២៕
