ភ្នំពេញ ៖ ព្រះអង្គម្ចាស់ នរោត្តម ចក្រាវុធ ព្រះប្រធានស្តីទីគណបក្សហ៊្វុនស៊ិនប៉ិច បានប្តេជ្ញាថែរក្សាគណបក្សហ៊្វុនស៊ិនប៉ិច ដែលជាកេរដំណែលរបស់ព្រះបរមរតនកោដ្ឋឱ្យបានគង់វង្សជាអមតៈ និងបានណែនាំអំពាវនាវឱ្យសមាជិក សមាជិកា រួបរួមគ្នាដើម្បីការពារគណបក្សហ៊្វុនស៊ិនប៉ិច ។ នេះបើតាមលោក ញឿន រ៉ាដែន អ្នកនាំពាក្យគណបក្សហ៊្វុនស៊ិនប៉ិច ថ្លែងប្រាប់ AMS នៅរសៀលថ្ងៃទី២៦ខែធ្នូ ឆ្នាំ២០២១។

អ្នកនាំពាក្យគណបក្សហ៊្វុនស៊ិនប៉ិច បន្តថា ការប្តេជ្ញានិងការអំពាវនាវរបស់ព្រះអង្គម្ចាស់ នរោត្តម ចក្រាវុធ បានធ្វើឡើងក្នុងពិធីសំណេះសំណាល និងសួរសុខទុក្ខ សមាជិកសមាជិកា រចនាសម្ព័ន្ធថ្នាក់ខេត្ត ស្រុក ឃុំ ជារចនាសម្ព័ន្ធ នាព្រឹកថ្ងៃទី២៦ ខែធ្នូឆ្នាំ២០២១ នៅទីស្នាក់ការគណបក្សខេត្ត ស្ថិតនៅសង្កាត់សុព័រទេព ក្រុងច្បារមន ខេត្តកំពង់ស្ពឺ។

ការប្តេជ្ញាបែបនេះ ក៏គាប់ជួនក្រុមលោក សាយ ហាក់ លោក ហេង ចន្ថា លោក ផាន់ សិទ្ធី និងមនុស្សមួយចំនួនដែលបាត់បង់នីតិសម្បទា និងសមាជិកភាពពីគណបក្សហ៊្វុនស៊ិនប៉ិច បាននាំគ្នាប្រជុំកាលពីរសៀលថ្ងៃទី២៣ ខែធ្នូ ឆ្នាំ២០២១ ដើម្បីសម្រេចយាងសម្ដេចរាជបុត្រី ព្រះអនុជ នរោត្តម អារុណរស្មី  មកដឹកនាំគណបក្សហ៊្វុនស៊ិនប៉ិច។  ប៉ុន្តែសម្ដេចរាជបុត្រី ព្រះអនុជ នរោត្តម អារុណរស្មី នៅមិនទាន់សម្រេចព្រះទ័យយ៉ាងណានៅឡើយទេ ដោយសារព្រះអង្គកំពុងតែនៅសហរដ្ឋអាមេរិក។

អ្នកនាំពាក្យគណបក្សហ៊្វុនស៊ិនប៉ិច លោក ញឿន រ៉ាដែន បានបញ្ជាក់ថា ក្រុមលោក សាយ ហាក់ លោក ហេង ចន្ថា  លោក ផាន់សិទ្ធី និងមនុស្សមួយចំនួនទៀត ដែលអះអាងថា ខ្លួនជាសមាជិកគណៈកម្មការនាយកគណបក្សហ៊្វុនស៊ិនប៉ិច និងបានទៅបង្កើតគណៈកម្មការប្រជុំដោយចិត្តឯងបែបនេះ គឺផ្ទុយពីច្បាប់ ពីព្រោះមនុស្សទាំងអស់នោះ បានបាត់បង់នីតិសម្បទា និងសមាជិកភាពពីគណបក្សហ៊្វុនស៊ិនប៉ិច   ហើយដោយអ្នកខ្លះត្រូវបានបញ្ចប់ពីតួនាទី ខ្លះបានសុំលាលែង និងខ្លះទៀតត្រូវបានសម្តេចក្រុមព្រះនរោត្តម រណឫទ្ធិ (កាលនៅមានព្រះជន្ម) បណ្តេញចេញពីគណបក្ស។

ការបញ្ជាក់របស់អ្នកនាំពាក្យគណបក្សហ៊្វុនស៊ិនប៉ិច  បានធ្វើឡើងបន្ទាប់ពីក្រុមអតីតជាន់ខ្ពស់មន្ត្រីគណបក្សហ៊្វុនស៊ិនប៉ិច បានប្រជុំកាលពីរសៀលថ្ងៃទី២៣ ខែធ្នូ ឆ្នាំ២០២១ នេះ ដើម្បីសម្រេចយាងសម្ដេចរាជបុត្រី ព្រះអនុជ នរោត្តម អារុណរស្មី  មកដឹកនាំគណបក្សហ៊្វុនស៊ិនប៉ិច។  ប៉ុន្តែសម្ដេចរាជបុត្រី ព្រះអនុជ នរោត្តម អារុណរស្មី  នៅមិនទាន់សម្រេចព្រះទ័យយ៉ាងណានៅឡើយទេដោយសារព្រះអង្គកំពុងតែនៅសហរដ្ឋអាមេរិក។

លោក ផាន់ សិទ្ធិ  អតីតមន្ត្រីជាន់ខ្ពស់គណបក្សហ្វ៊ុនស៊ិនប៉ិចបានប្រាប់ថា ពិតជាមានកិច្ចប្រជុំមែននៅសណ្ឋាគារភ្នំពេញ ដើម្បីយាងសម្ដេចរាជបុត្រី ព្រះអនុជ នរោត្តម អារុណរស្មី មក ធ្វើជា ប្រធានគណបក្សហ៊្វុនស៊ិនប៉ិច។  

លោក ញឿន រ៉ាដែន អ្នកនាំពាក្យគណបក្សហ៊្វុនស៊ិនប៉ិច បានមានប្រសាសន៍ប្រាប់ AMS ថា គណបក្សហ៊្វុនស៊ិនប៉ិច បានទាត់ចោលច្រើនដងហើយទាក់ទងទៅនឹងកិច្ចប្រជុំនានាដែលក្រុមមួយចំនួនដែលអះអាងថាខ្លួនជាគណៈកម្មការនាយកនោះ គឺពួកគាត់បាត់បង់នីតិសម្បទា និងសមាជិកភាពពីគណបក្សហើយ អ្នកខ្លះត្រូវបានសម្តេចក្រុមព្រះបញ្ចប់ពីតួនាទីពីគណបក្ស ហើយអ្នកខ្លះបានសុំលាលែង និងខ្លះទៀតត្រូវបានបណ្តេញចេញពីបក្ស។ អ្នកដែលចូលរួមប្រជុំមានដូចជា លោក ហេង ចន្ថា លោក ផាន់ សិទ្ធី លោកសាយ ហាក់ … ត្រូវបានគណបក្សបញ្ចប់បណ្តេញចេញពីគណបក្សរួចរាល់អស់ហើយ ហើយទៅបង្កើតគណៈកម្មការប្រជុំដោយចិត្តឯងបែបនេះ គឺផ្ទុយពីច្បាប់។ គណបក្សហ៊្វុនស៊ិនប៉ិច សូមទាត់ចោលទាំងស្រុងនៅកិច្ចប្រជុំដែលដឹកនាំដោយក្រុមលោក សាយហាក់។

លោក ញឿន រ៉ាដែន បានបញ្ជាក់ថា “ព្រះអង្គម្ចាស់ នរោត្តម ចក្រាវុធ លោកទទួលសិទ្ធិពីសម្តេចក្រុមព្រះក្នុងការដឹកនាំ ហើយការសម្រេចយ៉ាងណាទៀតគណបក្សនឹងជូនដំណឹងនៅពេលក្រោយ”។

សូមរម្លឹកថា ក្រុមលោក សាយ ហាក់ លោក ហេង ចន្ថា និងលោក ផាន់ សិទ្ធី រួមទាំងមនុស្សមួយចំនួន ដែលអះអាងថា ជាសមាជិកគណៈកម្មាធិការនាយកគណបក្សហ្វ៊ុនស៊ិនប៉ិច បានបើកអង្គប្រជុំវិសាមញ្ញ កាលពីថ្ងៃទី១៣ ខែធ្នូ ឆ្នាំ២០២១ ដើម្បីពិគ្រោះពិភាក្សារកមធ្យោបាយសម្របសម្រួលដោះស្រាយបញ្ហាផ្ទៃក្នុង និងត្រៀមបេក្ខភាពដែលមានលក្ខណៈសម្បត្តិ ដើម្បីជ្រើសតាំងជាប្រធានគណបក្សហ្វ៊ុនស៊ិនប៉ិចថ្មី ជំនួសសម្តេចក្រុមព្រះ នរោត្តម រណឫទ្ធិ ទ្រង់សោយព្រះទិវង្គត។

 បើតាមបញ្ជីឈ្មោះគណៈកម្មាធិការនាយកគណបក្សហ្វ៊ុនស៊ិនប៉ិច គឺ លំដាប់លេខរៀង បន្ទាប់ពីសម្តេចក្រុមព្រះ នរោត្តម រណឫទ្ធិដែលនឹងត្រូវជ្រើសតាំងជាប្រធានគណបក្ស ហ្វ៊ុនស៊ិនប៉ិច គឺព្រះអង្គម្ចាស់ក្សត្រី នរោត្តម អារុណរស្មី ដែលជាបងប្អូនបង្កើតជាមួយសម្តេចក្រុមព្រះ ម្តាយទីទៃ ពីគ្នា៕ 

ដោយៈពលជ័យ