ក្រុមហ៊ុនសេវាទូរស័ព្ទន័រវែស Telenor នឹងចាកចេញពីមីយ៉ាន់ម៉ា លក់ភាគហ៊ុនឱ្យក្រុមហ៊ុនសិង្ហបុរី
ក្រុមហ៊ុនផ្គត់ផ្គង់សេវាប្រព័ន្ធទូរគមនាគមន៍ន័រវែស Telenor បានព្រមព្រៀងលក់ភាគហ៊ុនចំនួន ៥១% របស់ខ្លួន ដែលមាននៅក្នុងក្រុមហ៊ុន Wave Money ដែលជាក្រុមហ៊ុនបង់ប្រាក់តាមទូរស័ព្ទដៃដ៏ធំជាងគេនៅមីយ៉ាន់ម៉ា ទៅកាន់ក្រុមហ៊ុនសាជីវកម្មយុទ្ធសាស្ត្រ Yoma (YSH) ដែលចុះបញ្ជីនៅប្រទេសសិង្ហបុរី។ ក្រុមហ៊ុន YSH នេះដែរក៏ជាក្រុមហ៊ុនដៃគូដ៏ធំនៅក្នុងក្រុមហ៊ុនមីយ៉ាន់ម៉ា Wave Money ផងដែរ។

បើតាមការចុះផ្សាយរបស់សារព័ត៌មាននីកេ ក្រុមហ៊ុនន័រវែសនេះនឹងលក់នៅក្នុងតម្លៃ ៥៣លានដុល្លារក្នុងតម្លៃជាលុយសុទ្ធ និងតម្លៃ ១០៤លានដុល្លារ ដែលជាតម្លៃនៅក្នុងលុយនៅកម្មវិធី Wave Money។ កិច្ចព្រមព្រៀងក្នុងការលក់នេះនឹងធ្វើការចុះហត្ថលេខានាពេលប៉ុន្មានថ្ងៃខាងមុខនេះ។
តាមពិតទៅ ក្រុមហ៊ុន Yoma នៅក្នុងប្រទេសមីយ៉ាន់ម៉ាដឹកនាំដោយសេដ្ឋីភូមាកាត់ចិន លោក Serge Pun មានចំណែក ៤៩% រួចមកហើយនៅក្នុងក្រុមហ៊ុន Wave Money។ ក្រុមហ៊ុនមួយនេះប្រកាសថានឹងយកចំណែករបស់ក្រុមហ៊ុន Telenor តាំងពីឆ្នាំ២០២០ តែនៅមិនទាន់មានកិច្ចព្រមព្រៀងដាច់ស្រេចទេ រហូតមកដល់ពេលនេះ។
ការលក់ភាគហ៊ុននេះត្រូវបានគេមើលឃើញថាជា ការព្យាយាមក្នុងការចាកចេញពីមីយ៉ាន់ម៉ាឱ្យដាច់ស្រេច ក្រោយពីក្រុមហ៊ុន Telenor ដែលធ្វើជំនួញផ្នែកប្រព័ន្ធទូរស័ព្ទនៅមីយ៉ាន់ម៉ាបង្ហាញពីចេតនាក្នុងការឈប់ប្រត្តិបត្តិការនៅក្នុងប្រទេសអាស៊ីអាគ្នេយ៍មួយនេះ បន្ទាប់ពីព្រឹត្តិការណ៍រដ្ឋប្រហារយោធាកាលពីខែកុម្ភៈ ឆ្នាំ២០២១។
ក្រុមហ៊ុនដែលមានការចូលភាគហ៊ុនចំនួន ៥៤% ពីរដ្ឋាភិបាលមីយ៉ាន់ម៉ាបានព្យាយាមលក់ក្រុមហ៊ុនទាំងមូល ដែលប្រតិបត្តិការនៅមីយ៉ាន់ម៉ាទៅកាន់ក្រុមហ៊ុនលីបង់ M1 Group បន្ទាប់ពីខ្លួនសងបំណុលរួចរាល់អស់ប្រមាណ ៧៨២លានដុល្លារ។
ក្រុមហ៊ុន M1 Group នេះជាក្រុមហ៊ុនបង្កើតដោយនាយករដ្ឋមន្ត្រីលីបង់លោក Najib Mikati ដែលកំពុងតែកាន់តំណែងក្នុងពេលបច្ចុប្បន្ននេះ និងបងប្រុសរបស់លោកឈ្មោះថា Taha Mikati។
យ៉ាងណាមិញ កិច្ចព្រមព្រៀងក្នុងការលក់ក្រុមហ៊ុននេះហាក់បីដូចជាបង្អាក់ដោយអាជ្ញាធរយោធាមីយ៉ាន់ម៉ា។ នេះបើតាមការចុះផ្សាយរបស់ព័ត៌មានក្នុងស្រុករបស់ប្រទេសនេះ។ មានការចុះផ្សាយមួយចំនួនបានឱ្យដឹងថា អាជ្ញាធរយោធាមីយ៉ាន់ម៉ាមានបំណងចង់ឱ្យក្រុមហ៊ុន Telenor លក់ទៅកាន់ក្រុមហ៊ុនណា ដែលបង្ហាញពីចំណាប់អារម្មណ៍ក្នុងការរកស៊ីជាមួយក្រុមហ៊ុននៅក្នុងស្រុក។
សារព័ត៌មាននីកេបានចុះផ្សាយថា ក្រុមហ៊ុនចុះបញ្ជីនៅសិង្ហបុរី Yoma ក៏បានបង្ហាញពីចំណាប់អារម្មណ៍ក្នុងការទិញក្រុមហ៊ុនរបស់ន័រវែសផងដែរ។
ចំពោះការលក់ភាគហ៊ុនរបស់ក្រុមហ៊ុន Telenor នៅក្នុងក្រុមហ៊ុនទូទាត់ប្រាក់ Wave Money នេះវិញ មានប្រភពដែលបានដឹងពីរឿងជំនួញនេះបានឱ្យដឹងថា ខាងយោធាហាក់បីដូចជាធ្វើទុក្ខបុកម្នេញប៉ុន្មាននោះទេ។ នេះបើតាមការចុះផ្សាយរបស់នីកេ។
ក្រៅពីនេះផងដែរ មតិលើកឡើងពីសកម្មជននានាបានបង្ហាញពីក្ដីព្រួយបារម្ភ ពាក់ព័ន្ធនឹងការតាមដាន និងរឹតត្បិតនានាពីសំណាក់អាជ្ញាធរយោធា ក្រោយពេលដែលក្រុមហ៊ុន Telenor ចាកចេញទៅ៕