អង្គការណាតូ៖ ខ្លួន​កំពុង​ដាក់​កម្លាំង​អោយ​ប្រុង​ជើងការ ​និង​ពង្រឹង​អឺរ៉ុប​ខាងកើត ចំពេលមានភាពតានតឹងជុំវិញវិបត្តិអ៊ុយក្រែន

ព្រុចសែល៖ អង្គការ​ណា​តូ​បញ្ជាក់ថា ខ្លួន​កំពុង​ដាក់​កម្លាំង​ឱ្យ​ប្រុង​ជើងការ​ និង​ពង្រឹង​អឺរ៉ុប​ខាងកើត​ជាមួយ​នាវា ​និង​យន្តហោះ​ចម្បាំង​​បន្ថែមទៀត នៅក្នុង​អ្វីដែល​រុស្ស៊ី​បាន​ថ្កោលទោស​ថា ​ជា “​រោគ​ចិត្ត​” របស់​លោក​ខាងលិច​ ក្នុង​ការឆ្លើយតប​ទៅនឹង​ការបង្កើន​កងទ័ព​របស់​ខ្លួន​នៅ​តាម​ព្រំដែន​អ៊ុ​យក្រែន​។​

អគ្គលេខាធិការអង្គការណាតូលោក ជែន ស្តូល​ធិន​បឺក បានបញ្ជាក់នៅក្នុងសេចក្តីថ្លែងការណ៍ថា ណា​តូនឹង​ចាត់វិធានការ​ចាំបាច់​ទាំងអស់ ហើយថា យើង​នឹង​ឆ្លើយតប​ជា​និច្ច​ចំពោះ​ការថយចុះ​ណាមួយ​ នៃ​បរិយាកាស​សន្តិសុខ​របស់​យើង​រួមទាំង​តាមរយៈ​ការពង្រឹង​ការការពារ​​រួម​របស់​យើង​​។​​លោក​បាន​ប្រាប់​សន្និសីទ​សារព័ត៌មាន​ថា វត្តមាន​ដែល​បាន​ពង្រឹង​នៅ​ផ្នែក​ខាងកើត​របស់​អង្គការ​ណា​តូ​ក៏​អាច​រួមបញ្ចូល​ផងដែរ ​នូវ​ការ​ដាក់​ពង្រាយ​ក្រុម​សមរភូមិ​នៅ​ភាគ​អាគ្នេយ៍​នៃ​សម្ព័ន្ធ​មិត្ត​។​ មកទល់​ពេលនេះ អង្គការ​ណា​តូ​មាន​កងទ័ព​ប្រមាណ ៤ពាន់នាក់​នៅក្នុង​កងវរសេនាតូច​ចម្រុះ​ជាតិ​សាសន៍​នៅក្នុង​ប្រទេស​អេ​ស្តូ​នី លី​ទុយ​អា​នី ឡេតូ​នី និង​ប៉ូឡូញ ដែល​គាំទ្រ​ដោយ​រថក្រោះ​ខែល​ការ​​ពារ​ដែនអាកាស និង​អង្គភាព​ស៊ើបការណ៍ ​និង​ឃ្លាំមើល​។​

អង្គការ​ណា​តូ​បានបញ្ជាក់ថា ប្រទេស​ដា​ណឺ​ម៉ាក អេ​ស្ប៉ាញ បារាំង និង​ហូ​ឡង់ សុទ្ធតែ​មាន​ផែនការ ឬ​ពិចារណា​ក្នុង​ការបញ្ជូន​កងទ័ព យន្តហោះ ឬ​នាវា​ទៅកាន់​អឺរ៉ុប​ខាងកើត​។ អ៊ុយ​ក្រែន​មាន​ព្រំប្រទល់​ជាប់​នឹង​ប្រទេស​ចំនួន​បួន​របស់​អង្គការ​ណា​តូ​ គឺ​ប៉ូឡូញ ស្លូ​វ៉ាគី ហុងគ្រី និង​រូ​ម៉ា​នី៕ ប្រភព៖ ​CNA

ឈឹម​ ទីណា​
ឈឹម​ ទីណា​
តាមរយៈការចូលរួមនៅតាមស្ថាប័នធំៗជាច្រើន រួមមានទូរទស្សន៍ គេហទំព័រ និងបណ្តាញសង្គមនានា បូករួមនឹងជំនាញបន្ថែមក្នុងការសរសេរ កាត់ត និងអាន នឹងផ្ដល់ជូនទស្សនិកជននូវព័ត៌មានដ៏សម្បូរបែបប្រកបដោយទំនុកចិត្ត និងវិជ្ជាជីវៈ។
ads banner
ads banner
ads banner