ឯកឧត្ដម អ៊ុន ចាន់ដា អភិបាលនៃគណៈអភិបាលខេត្តកំពង់ចាម នៅព្រឹកថ្ងៃទី២៥ ខែមករា ឆ្នាំ ២០២២នេះ អញ្ជើញជួបសំណេះសំណាល និងផ្តល់ការឧបត្ថម្ភជា សម្ភារ និងថវិកា មួយចំនួនជូនដល់សិស្សានុសិស្ស នៅក្រុងកំពង់ចាមចំនួន៣២នាក់ ដែលទទួលបាននិទ្ទេសA ក្នុងការប្រឡងមធ្យមសិក្សាទុតិយភូមិ ក្នុងឆ្នាំសិក្សា ២០២០-២០២១ នៅសាលាខេត្តកំពង់ចាម ។

ឯកឧត្តម អភិបាលខេត្ត បានថ្លែងការកោតសរសើរចំពោះលោកគ្រូ អ្នកគ្រូ ដែលបានខិតខំបង្ហាត់បង្រៀនសិស្សានុសិស្សគ្រប់មធ្យោបាយ ទាំងតាមអនឡាញ និងបង្រៀនដោយផ្ទាល់ ក្នុងកំឡុងពេលរាតត្បាតជំងឺកូវីដ-១៩ រហូតសិស្សានុសិស្សយើងទទួលបានជោគជ័យយ៉ាងត្រចះត្រចង់នាពេលនេះ។ ជាពិសេសឯកឧត្តម អភិបាលខេត្តក៏បានថ្លែងការកោតសរសើរចំពោះកិច្ចខិតខំប្រឹងប្រែងរៀនសូត្ររបស់សិស្សានុសិស្សទាំងអស់ ដែលបានទៅចូលរួមប្រឡងមធ្យមសិក្សាទុតិយភូមិ ឆ្នាំ២០២១ ទទួលបានលទ្ធផលប្រឡងជាប់ទូទាំងខេត្ត រហូតទៅដល់ ៦៣.៩៧% ស្មើរនឹងចំនួន ៤៣៣៣នាក់ ស្រីចំនួន ២៦១៥ នាក់។

ឯកឧត្តម អ៊ុន ចាន់ដា អភិបាលខេត្ត ក៏បានជំរុញ និងលើកទឹកចិត្តឲ្យក្មួយៗសិស្សានុសិស្សទាំងអស់ត្រូវខិតខំសិក្សារៀនសូត្រចំណេះជំនាញ នៅមហាវិទ្យាល័យជាបន្តទៀត ដើម្បីក្លាយខ្លួនជាកូនល្អ សិស្សល្អ ប្រជាពលរដ្ឋល្អ និងជាបញ្ញវ័ន្ដ នាពេលអនាគត នឹងដើម្បីយកចំណេះជំនាញទាំងនោះ ទៅចូលរួមចំណែកកសាង អភិវឌ្ឍន៍ជាតិមាតុភូមិ កម្ពុជា និងជាការរួមចំណែកជាមួយរាជរដ្ឋាភិបាលកម្ពុជា ក្រោមការដឹកនាំដ៏ភ្លឺស្វាងរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

ឯកឧត្តម អ៊ុន ចាន់ដា បានឧបត្ថម្ភ សម្ភារៈ និងថវិកាមួយចំនួន ជូនដល់សិស្សានុសិស្សនិន្ទេស A សម្រាប់ឆ្នាំសិក្សា ២០២០ -២០២១ ក្នុងសិស្សម្នាក់ៗ ទទួលបាន-កុំព្យូទ័រ (Latop) ១ គ្រឿង ថវិកា ចំនួន ៤០០,០០០ រៀល និងសម្ភារសិក្សាមួយចំនួនទៀត ៕