ភ្នំពេញ ៖ សមត្ថកិច្ចជំនាញនៃមន្ទីរប្រឆាំងបទល្មើសគ្រឿងញៀន បានបង្ហាញមុខជនសង្ស័យចំនួន ២នាក់ ជាប់ពាក់ព័ន្ធទៅនឹងករណីជួញដូរគ្រឿងញៀនជាង ១គីឡូក្រាម នៅរាជធានីភ្នំពេញ ជាសាធារណៈ មុននឹងបញ្ជូនទៅសាលាដំបូងរាជធានីភ្នំពេញ ចាត់វិធានការតាមនីតិវិធី នៅរសៀលថ្ងៃទី៧ ខែកុម្ភៈ ឆ្នាំ២០២២នេះ ។

ជនសង្ស័យទាំងពីរនាក់ ឈ្មោះ វ៉ែន សំណាងរ័ត្ន ភេទស្រី អាយុ២២ឆ្នាំ ជនជាតិ ខ្មែរអ៊ិស្លាម និងឈ្មោះ ឯល អាត់ទរី ភេទស្រី អាយុ១៩ឆ្នាំ ជនជាតិខ្មែរអ៊ិស្លាម ។ ពួកគេត្រូវបានសមត្ថកិច្ចចាប់ខ្លួននៅពេលកម្លាំងចុះឆែកឆេរផ្ទះលេខ១២ សង្កាត់ច្រាំងចំរេះ ខណ្ឌឫស្សីកែវ រាជធានីភ្នំពេញ នៅវេលាម៉ោង ១៩:៣០នាទី។ ចំពោះវត្ថុតាងចាប់យកមាន មេតំហ្វេតាមីន (ICE) ទម្ងន់សុទ្ធ ១គីឡូក្រាម ៣០១,៩៩ក្រាម។

សូមបញ្ជាក់ថា ក្នុងប្រតិបត្តិការបង្ក្រាបនេះ ធ្វើឡើងកាលពីរសៀល ថ្ងៃទី៤ ខែកុម្ភៈ ឆ្នាំ២០២២ នៅចំណុចបណ្តោយផ្លូវជាតិលេខ៥ សង្កាត់ច្រាំងចំរេះ ខណ្ឌឬស្សីកែវ រាជធានីភ្នំពេញ និងផ្ទះលេខ១២ សង្កាត់ច្រាំងចំរេះ ខណ្ឌឬស្សីកែវ រាជធានីភ្នំពេញ៕