ការប្រកួតកីឡាប៉េតង់ ជ្រើសរើសជើងឯកថ្នាក់តំបន់ មណ្ឌលខេត្តព្រៃវែងបានបញ្ចប់ជាស្ថាពរ នៅថ្ងៃទី២៨ ខែកុម្ភ: ឆ្នាំ២០២២នេះ ខណៈគណៈកម្មការបច្ចេកទេសបានរកឃើញម្ចាស់ជ័យលាភីទាំង៦វិញ្ញាសា។

តំណាងគណ:កម្មការបច្ចេកទេសបញ្ជាក់ជូនងា វិញ្ញាសាចំនួន៦នេះ រួមមាន៖ វិញ្ញាសា ៣នាក់ ទល់៣នាក់ បុរស-នារី , វិញ្ញាសា ១នាក់ ទល់១នាក់ យុវជន-យុវនារី និងវិញ្ញាសាវាយយកពិន្ទុ បុរស-នារី។ ព្រឹត្តិការណ៍នេះស្រូបបានកីឡាករសរុបចូលរួមប្រកួតប្រជែង សរុប៤៦នាក់ ដែលប្រព្រឹត្តទៅរយៈពេល២ថ្ងៃ ២៧-២៨ ខែកុម្ភៈ ឆ្នាំ២០២២ នៅខេត្តព្រៃវែង។

គណៈកម្មការរៀបចំការប្រកួតបានសំដែងនូវមនោសញ្ចេតនារីករាយបំផុត ចំពោះវត្តមាន គណៈអធិបតី ភ្ញៀវកិត្តិយស លោកគ្រូ អ្នកគ្រូ ដែលបានឆ្លៀតឱកាសដ៏មមាញឹក អញ្ជើញមកចូលរួម ក្នុងពិធីបិទ ការប្រកួតកីឡាប៉េតង់ ជ្រើសរើសជើងឯកថ្នាក់តំបន់ ដែលញ៉ាំងឱ្យពិធីនេះប្រកបដោយ បរិយាកាស រីករាយក្រៃលែង។

ការរៀបចំប្រកួតនេះក្នុងគោលបំណងជ្រើសរើសយកក្រុមកីឡាករ កីឡាការិនី នៅក្នុងតំបន់ ដែលមកពីខេត្តចំនួន ៥ខេត្តគឺខេត្តព្រៃវែង ខេត្តស្វាយរៀង ខេត្តកណ្តាល ខេត្តកំពង់ចាម និងខេត្តត្បូងឃ្មុំ ដែលមានសមត្ថភាព
និងទេពកោសល្យ ចំណាត់ថ្នាក់លេខ១ និងលេខ២ ដើម្បីចូលរួមការប្រកួតជ្រើសរើសជើងឯកថ្នាក់ជាតិ ប្រចាំឆ្នាំ២០២១ នៅរាជធានីភ្នំពេញ ។

ឆ្លងតាមការប្រកួតយ៉ាងសកម្ម ស្វិតស្វាញអស់រយៈពេល២ថ្ងៃនេះបានកត់សម្គាល់ឃើញថា ក្រុមកីឡាករ កីឡាការិនីទាំងអស់បានយកអស់កម្លាំងកាយ កម្លាំងចិត្ត សមត្ថភាពបច្ចេកទេស និងទេពកោសល្យរបស់ខ្លួនចូលរួមប្រកួតប្រកបដោយទឹកចិត្តក្លៀវក្លាក្នុងនាមជាអ្នកកីឡា។ កាយវិការដែលក្រុមកីឡាករ កីឡាការិនី បានអនុវត្តក្នុងការប្រកួត លើកនេះ គឺពិតជាឈរលើស្មារតីគោរពវិន័យ បទបញ្ជាបច្ចេកទេស និងចេះស្រឡាញ់យោគយល់អធ្យាស្រ័យគ្នា។ សក្ខីកម្មនេះ បានបង្ហាញថា ក្រុមកីឡាករ កីឡាការិនីបានលយល់យ៉ាងច្បាស់នូវ មនសិការកីឡា និងបានផ្សារភ្ជាប់យ៉ាងជិទស្និទ្ធនូវចំណងសាមគ្គីភាព ភាតរភាព និងការយោគយល់គ្នាដែលជាគំរូមួយដ៏ល្អសម្រាប់អនាគតប្រទេសជាតិរបស់យើង។

សូមបញ្ជាក់ថា ពិធីបំពាក់មេដាយទទួលបានការផ្តល់កិត្តិយសពីឯកឧត្តម អន វិរៈ អភិបាលរង នៃគណៈអភិបាលខេត្ត តំណាងដ៏ខ្ពង់ខ្ពស់ ឯកឧត្តម ជា សុមេធី អភិបាលនៃគណៈអភិបាលខេត្ត៕ ដោយ៖ ចាន់ វិចិត្រ