វៀតណាមប្រហែលជារងការខាតបង់ខាងសេដ្ឋកិច្ចមានកំណើនយឺត ប្រសិនបើបញ្ហាបំពុលបរិស្ថានកាន់តែអាក្រក់ខ្លាំងនោះ នេះបើតាមការព្រមានរបស់លោក Nguyễn Hoàng Nam មន្ត្រីក្រសួងធនធានធម្មជាតិ និងបរិស្ថានវៀតណាម ចេញផ្សាយដោយសារព័ត៌មាន Vietnamnews កាលពីថ្ងៃទី១៣ វិច្ឆិកា ម្សិលមិញ។

មានប្រសាសន៍ក្នុងសិក្ខាសាលាមួយថ្មីៗនេះ លោក Nam បាននិយាយថា វៀតណាមបានជាប់ចំណាត់ថ្នាក់លេខ៤ក្នុងចំណោមបណ្តាប្រទេស និងតំបន់ទាំងអស់ក្នុងពិភពលោក ប្រឈមខ្លាំងលើបញ្ហាផ្លាស្ទីក ប៉ុន្តែហាក់មិនមានសមមាត្រនឹងទំហំប្រទេសនិងចំនួនប្រជាជនទេ។

ប្រភពបានឲ្យដឹងដែរថា ប្រទេសចំនួន៣ដែលប្រឈមនឹងបញ្ហាផ្លាស្ទីកខ្លាំងបំផុតនោះ រួមមាន ចិន ឥណ្ឌូនេស៊ី និងហ្វីលីពីន។
ធនាគារពិភពលោក កាលពីឆ្នាំ២០១៩ បានប៉ាន់ប្រមាណថា ផលប៉ះពាល់ដោយសារតែការបំពុលបរិស្ថានប្រហែលជាកាត់បន្ថយ៣.៥ភាគរយ នៃផលិតផលសរុបក្នុងស្រុក ឬ GDP នៅប្រទេសវៀតណាម នាឆ្នាំ២០៣៥ខាងមុខនេះ បើតាមការលោក Nam ដដែល៕ធ.ដ