បាងកក ៖ ក្រសួងសុខាភិបាលថៃ នៅថ្ងៃចន្ទទី២ ខែឧសភា ឆ្នាំ២០២២នេះ បានរាយការណ៍ពីការរកឃើញករណីឆ្លងជំងឺ COVID-19 ថ្មីៗចំនួន ៩,៣៣១ករណីបន្ថែមទៀត ក្នុងរយៈពេល ២៤ម៉ោងចុងក្រោយនេះ។ ក្រៅពីការរកឃើញករណីឆ្លងថ្មីៗខាងលើ អ្នកជំងឺចំនួន ៨៤នាក់បន្ថែមទៀត ក៏ត្រូវបានរាយការណ៍ថាស្លាប់ផងដែរ ក្នុងរយៈពេលដូចគ្នានេះ។

ក្នុងចំណោមករណីឆ្លងថ្មីៗខាងលើ មាន ៩,២៧៣ករណី ជាករណីឆ្លងក្នុងសហគមន៍ និង ៥៨ករណីទៀតជាករណីនាំចូល ខណៈអ្នកជំងឺចំនួន ២១,១៦៨នាក់ផ្សេងទៀត ត្រូវបានអនុញ្ញាតឱ្យចាកចេញពីមន្ទីរពេទ្យ ក្រោយជាសះស្បើយ។

គួរបញ្ជាក់ថា រហូតមកទល់ពេលនេះ ប្រទេសថៃបានកត់ត្រានូវករណីឆ្លងជំងឺ COVID-19 សរុបនៅទូទាំងប្រទេសចំនួន ៤,២៧១,៨១៥ករណី ក្នុងនោះមានអ្នកស្លាប់ ២៨,៧០១នាក់ និងអ្នកជាសះស្បើយឡើងវិញគឺ ៤.១១លាននាក់។

គិតត្រឹមពេលនេះ ប្រទេសថៃត្រូវគេគណនាថា បានចាក់វ៉ាក់សាំងបង្ការជំងឺ COVID-19 សរុបជាង ១៣៣លានដូស ក្នុងនោះប្រជាជនជាង ៥១.១៧លាននាក់ (៧៣.៣% នៃចំនួនប្រជាជនសរុប) បានទទួលការចាក់គ្រប់ដូស និង ២៥.៨៨លាននាក់ (៣៧.១%) បានចាក់ដូសជំរុញ៕ ប្រែសម្រួល៖ សារ៉ាត