បាងកក៖ រដ្ឋមន្ត្រីថាមពលប្រទេសថៃ លោក Supattanapong Punmeechaow កាលពីថ្ងៃទី៥ កក្កដា ២០២២ បាននិយាយថា មានប្រេងឆៅបម្រុង សម្រាប់រយៈពេលពី ៦០ ទៅ ៧០ ថ្ងៃ។ លោក Supattanapong បាននិយាយថា ប្រទេសថៃបាន បង្កើនទុន បម្រុងប្រេងរបស់ខ្លួនទ្វេដង ពី៣០ថ្ងៃ នៅក្នុងស្ថានភាពធម្មតា ដោយសារតែវិបត្តិថាមពលពិភពលោកដែលបណ្តាលមកពីសង្រ្គាមរុស្ស៊ី-អ៊ុយក្រែនដែលកំពុងបន្ត។

លោកបាននិយាយថា ស្ថានភាពស្តុកប្រេងត្រូវបានរាយការណ៍នៅក្នុង កិច្ចប្រជុំរបស់ក្រុមប្រឹក្សាសន្តិសុខជាតិ ដែលដឹកនាំដោយនាយក រដ្ឋមន្ត្រី ប្រាយុទ្ធ ចាន់អូចា កាលពីថ្ងៃចន្ទ ដោយគេដឹងថា វាជាលើក ទីមួយហើយដែលលោក ប្រាយុទ្ធ បានប្រើប្រាស់កិច្ចប្រជុំ NSC ដើម្បីពិភាក្សាអំពីវិបត្តិថាមពល។

លោករដ្ឋមន្ត្រីថាមពលបាននិយាយថា កិច្ចប្រជុំមានប្រយោជន៍ ព្រោះគ្រប់ សេណារីយ៉ូគ្រប់ទំហំ ត្រូវបានពិភាក្សា។ លោក ថា ក្រសួងថាមពលបានបង្ហាញផែនការបន្ទាន់ទាំងអស់ ក្នុងករណីមាន ការខ្វះខាតប្រេងនៅក្នុងប្រទេស។

លោកបានបន្ថែមថា ក្រសួងពាណិជ្ជកម្ម ក្រសួងកសិកម្ម និងភ្នាក់ងារ អនុវត្តច្បាប់សំខាន់ៗក៏បានបង្ហាញពីផែនការរបស់ពួកគេក្នុងការទប់ទល់នឹងស្ថានភាព ប្រសិនបើមានការខ្វះខាតប្រេងកើតឡើង។

លោកបានបន្ថែមថា រាជរដ្ឋាភិបាលបានស្វះស្វែងរកកិច្ចសហ ប្រតិបត្តិ ការពីរោងចក្រចម្រាញ់ប្រេង ដើម្បីស្វែងរកប្រភពប្រេងឆៅ និងឧស្ម័ន ធម្មជាតិបន្ថែមទៀត ក្នុងករណីសង្រ្គាមកាន់តែកើនឡើង ហើយការដឹក ជញ្ជូនប្រេង និងឧស្ម័នត្រូវបានរំខាន៕
ដោយ៖ សារ៉ាត