ញូដេលី៖ យ៉ាងហោចណាស់មនុស្ស ៩នាក់បានស្លាប់ នៅក្នុងរដ្ឋ Madhya Pradesh ភាគកណ្តាលរបស់ប្រទេសឥណ្ឌា បន្ទាប់ពីមន្ទីរពេទ្យមួយបានឆាបឆេះ នៅថ្ងៃចន្ទដើមសប្តាហ៍នេះ។

របាយការណ៍ប្រព័ន្ធផ្សព្វផ្សាយបាននិយាយថា ជនរងគ្រោះនៃអគ្គិភ័យដែលបានឆាបឆេះនៅក្នុងបន្ទប់ថែទាំបន្ទាន់ ICU នៃមន្ទីរពេទ្យ New Life ក្នុងទីក្រុង Jabalpur រួមមានអ្នកជំងឺ ៥នាក់ និងបុគ្គលិកមន្ទីរពេទ្យ ៣នាក់ ។

ប្រព័ន្ធផ្សព្វផ្សាយបានរាយការណ៍ថា មូលហេតុដែលអាចបណ្តាលឲ្យមានអគ្គិភ័យនេះ គឺបណ្តាលមកពីទុស្សេខ្សែភ្លើង ដែលបណ្តាលឲ្យរលាកធ្ងន់ធ្ងរ និងបានសម្លាប់មនុស្ស ៩នាក់ ខណៈអ្នករបួសជាច្រើននាក់ទៀត ត្រូវបញ្ជូនទៅមន្ទីរពេទ្យមួយផ្សេងទៀត។

ប្រតិបត្តិការជួយសង្គ្រោះនៅតែកំពុងដំណើរការ ខណៈកងកម្លាំងឆ្លើយតបគ្រោះមហន្តរាយរដ្ឋបានព្យាយាមស្វែងរកជនរងគ្រោះបន្ថែមទៀត ៕ ដោយ៖ សារ៉ាត